Almatynyń Túrksib aýdanynda 10 myńǵa jýyq úı ortalyq sý júıesine qosylmaǵan

ALMATY. QazAqparat - Túrksib aýdanynda uzyndyǵy 11 shaqyrym sý qubyry qalpyna keltirildi. Bul týraly Erbolat Dosaev aýdan turǵyndarymen kezdesýinde aıtty, dep habarlaıdy QazAqparat tilshisi.

«Sizdermen aqpan aıynda kezdeskenimizde Baımaǵambetov – Shemıakın – Komıntern – Aıtyqov kósheleriniń bóligindegi jumys istemeıtin sý qubyry jáne kanalızatsııa jelisin Almaty sýdyń balansyna berý týraly másele kóterilgen edi. Búgingi tańda uzyndyǵy 11 km jeli qalpyna keltirildi. Oǵan qosa osy jyldyń jeltoqsan aıynyń sońyna deıin 3 kanalızatsııalyq sorǵy stansasynyń qurylysy aıaqtalady»,- dedi shahar basshysy.

Nátıjesinde jyl sońyna deıin osy shaǵyn ýchaskedegi 1 myń úıdi ortalyq sý jelisine, al kelesi jyly sý burý jelisine qosýǵa múmkindik paıda bolady.

«Jas qanat» jáne «Shýaqty» shaǵynaýdandarynda ınjenerlik jelilerdi І toqsanda, «Nıjnıaıa pıatıletka» shaǵynaýdanynda 2023 jyldyń sońyna deıin iske qosý josparlanǵan.

Bul osy shaǵynaýdandardyń 20 myńnan astam turǵynyna (20 150 adam, 5,5 myń úı) ortalyq kommýnıkatsııalarǵa qosylýǵa múmkindik alady.

Jumys júrgizilgennen keıin jol jabyny qalpyna keledi.

Aıtýynsha, búgingi tańda Túrksib aýdanynda áli de ortalyq sýmen qamtý jáne sý burý jelilerine qosylmaǵan 9 500 úı bar.

«Qazir bul úıler boıynsha jobalyq-smetalyq qujattamany ázirleýge konkýrs jarııalandy. Qujat ázirlenip, memlekettik saraptamadan ótkennen keıin 2024 jyly jumysty bastaımyz»,- dedi ol.