Almatynyń týrızmi ınvestıtsııalarǵa tartymdy - Baýyrjan Baıbek
Ákim jeke tulǵalardyń, sonyń ishinde sheteldikterdiń ınvestıtsııalaryn tartýdyń basty sharty - qaladaǵy jaılylyq, damyǵan servıs jáne adam kapıtaly sapasynyń joǵarylyǵy ekendigin atap kórsetti.
«Qalamyzdyń tabıǵaty tamasha, belsendi demalý úshin búkil múmkindik bar. Medeý muz aıdyny kúlli álemge áıgili. Shymbulaq TMD-nyń úzdik taý-shańǵy kýrorty atandy. Qonaqtar úshin 2 myń meıramhana, 237 qonaqúı men hostel, 20 mýzeı, 19 teatr, 14 kórme jáne galereıa, 128 saýda, oıyn-saýyq kesheni qyzmet etedi. Qazaqstanǵa kelgen sheteldik týrısterdiń jartysy Almatyǵa soqpaı ketpeıdi», - dedi Baýyrjan Baıbek.
Ákimniń aıtýynsha, Almaty aglomeratsııasynyń taýly lokatsııalarynyń master-jospary ázirlenip jatyr.
«Halyqaralyq sarapshylardyń aıtýynsha, ony iske asyrý shańǵy trassalaryn 5,5 ese - 237 shaqyrymǵa deıin uzartýǵa, shańǵyshy týrısterdiń sanyn 6 ese - 46 myńǵa deıin kóbeıtýge, trekıng, haıkıng sııaqty belsendi demalystyń kóptegen túrine arnalǵan 500 kılometrge jýyq soqpaq salý múmkindigin beredi», - deıdi ákim.
Baýyrjan Baıbektiń sózine qaraǵanda, iskerlik týrızmdi damytý úshin jalpy aýdany 15 myń sharshy metrdi quraıtyn kongress ortalyǵy bar kórme keshenin salý josparlanǵan.
Budan tys, ákimniń oıynsha, medıtsınalyq qyzmetter sapasynyń joǵary bolýy da týrıster men ınvestorlardy tartýdyń mańyzdy faktory. Osy maqsatta Reseıdiń «Medınvestgrýpp» kompanııasymen qaladaǵy onkologııalyq qyzmetti damytý jónindegi memorandýmǵa qol qoıylǵan, al №1 qalalyq aýrýhananyń bazasynda Ońtústik Koreıa emhanalarynyń tájirıbesin engizip jatyr.