Almatynyń tirshiligi qalypty jaǵdaıǵa oralýda - Baqytjan Saǵyntaev
Qala ákimi Prezıdenttiń batyl is-qımyly men sheshimi eldiń kúıreýiniń aldyn alýǵa septigin tıgizgenin aıtty.
«Biz qazaqstandyqtardyń qıyn kezeńde uıymshyl bolyp, jumylǵan judyryqtaı áreket ete alatynyna taǵy da kóz jetkizdik. Almatylyqtarǵa tártipsizdik kezinde kórsetken sabyrlylyq pen batyldyq jáne bizge kórsetken kómekterińiz úshin alǵys aıtamyn», - dedi qala ákimi.
Aıta keteıik, qazirgi ýaqytta Almatynyń tynys-tirshiligin qalpyna keltirý jónindegi qalalyq shtab táýlik boıy jumys isteýde. Qalanyń barlyq qyzmetteri antıterrorıstik ortalyqpen tyǵyz qarym-qatynasta. Barlyq máseleler kelisilgen túrde sheshilýde jáne qala birtindep qalypty jaǵdaıǵa oralýda.
Qalanyń barlyq aýdandarynda tazalyq jumystary júrgizilýde. Kóshelerden 200 tonnadan astam qoqys, aýlalardan myń tonnadan astam QTQ shyǵaryldy. Kommýnaldyq qyzmetter áskerı qyzmetshiler zalalsyzdandyrǵan aýmaqtarǵa kiredi. Quqyq qorǵaý organdary qalany tazartýdy jalǵastyrýda. Bul kúnderi qalanyń tynys-tirshiligin qamtamasyz etý júıesi úzilissiz jumys istedi. Halyqty sýmen jabdyqtaý, káriz, gazben jabdyqtaý, jylý qyzmetterimen qamtamasyz etý shtattyq rejımde júrgiziledi.
Qalanyń azyq-túlik qaýipsizdigi qamtamasyz etildi. 80-ge jýyq sýpermarket, úsh iri azyq-túlik bazary, 70-ke jýyq JQS, 111 dárihana jumys isteı bastady, olardyń úsheýi táýlik boıy jumys isteıdi. Avtogaz baǵasy lıtrine 70 teńgege deıin tómendedi.
Qala ákimi Baqytjan Saǵyntaev tótenshe jaǵdaı rejıminiń talaptaryn múltiksiz saqtaý jáne komendanttyq saǵatty buzbaý qajettigin eske saldy.
«Qabyldanyp jatqan sharalar qala ómirin birtindep qalypqa keltirýge múmkindik berdi. Bizden tek sabyrlyq, shydamdylyq pen túsinistik qajet», - dedi ol.