Almatynyń taýly aýdandarynda qurylysqa tyıym salynbaq

ALMATY. QazAqparat – Qalanyń taýly aýdandarynda qurylysqa tyıym salý máselesin Almatynyń mamandandyrylǵan tabıǵat qorǵaý prokýratýrasy kóterdi. Organ taýly aımaqta qurylys pen alma baqtardy kesý jaǵdaılarynyń jıilep ketýine baılanysty taldaý júrgizgen, dep habarlaıdy QazAqparat tilshisi.

Vedomstvo ókilderiniń aıtýynsha, buryn jer paıdalanýshylarǵa menshik quqyǵy berilip, qurylysqa tyıym salý úshin zańnamalyq negizder bolmaǵan.

«Osy máseleni taldaý qorytyndylary boıynsha biz qala ákimdigine taýly jerdegi jer ýchaskelerin rekreatsııalyq aımaqqa jatqyzý máselesin qaraýdy usynyp, qadaǵalaý aktisin engizdik. Bul zań boıynsha kórsetilgen aımaqta jańa obektilerdiń qurylysyna tyıym salýǵa múmkindik beredi. Atalǵan usynystar qoldaý tapty. Endi ákimdik egjeı-tegjeıli josparlaý jáne qala qurylysynyń Bas josparyna tıisti ózgerister engizedi. Olar osy jyldyń maýsymynda bekitilýi kerek. Sondaı-aq, osy taldaý barysynda Observatorııa kóshesinde turǵyn úı qurylysy kezinde alma baqtaryn zańsyz kesý deregi anyqtaldy. Medeý aýdandyq polıtsııa basqarmasy atalǵan derek boıynsha sotqa deıingi tergeýdi bastady», - dep habarlady tabıǵat qorǵaý prokýratýrasynan.

Eske salsaq, Memleket basshysynyń qabyldaýynda bolǵan Almaty qalasynyń ákimi Erbolat Dosaev Prezıdentke Almatydaǵy nóser jaýynǵa arnalǵan káriz júıesin jańǵyrtý baǵdarlamasyn tanystyrdy.