Almatynyń tanymal tulǵalary qala turǵyndarynyń nazaryn mýzeıge aýdarmaq
Almatyda «Rýhanı jańǵyrý» baǵdarlamasy aıasynda, alyp shahardyń 1001 jyldyǵyna oraı, «Mýzeı maýsymy» jobasy búgin saltanatty túrde óz jumysyn bastady. Ideıa avtory, QR Eńbek sińirgen qaıratkeri Azamat Satybaldy joba eki aıǵa josparlanǵanyn, eger halyqtyń kóńilinen shyǵyp jatsa, jyldyń sońyna deıin jalǵasyn tabýy yqtımal ekenin jetkizdi.
«Almaty qalasy ákimdiginiń qoldaýymen, Elbasymyzdyń «Rýhanı jańǵyrý» baǵdarlamasy aıasynda «Mýzeı maýsymy» jańa jobany bastap otyrmyz. 1 000 jyldyq tarıhy bar Almatynyń jańadan ashylǵan mýzeıin tanytý barshamyzdyń mindetimiz. Búgin maýsymdy saltanatty túrde ashyp otyrmyz. Erteńnen bastap, qonaqtarymyzben jumys bastalady. Ár beısenbi kúni jasaǵan jumysymyzdy qorytyndylaıtyn bolamyz. Sharada qonaqtar arasynda «Úzdik selfı», mektep oqýshylary arasynda mýzeı týraly «Úzdik shyǵarma», Almatydaǵy foto tilshilerge arnalǵan «Foto sessııa» ataýlary boıynsha jumystardy iriktep alyp, syılyqtar tabys etemiz. Sondaı-aq, «Men Almatynyń bólshegimin» ataýymen bir jobamyz bar. Ol joba boıynsha almatylyqtar óz úıindegi mýzeıge turatyndaı esteligin tartý ete alady. Jeltoqsan aıynda eń jaqsy jádiger tartý etken adamǵa Almaty ákimi atynan alǵys hat berilip, óz tarapymyzdan syılyq tartý etemiz. Mysaly, men ózim 1958 jyly jasalǵan tank ishinde turatyn saǵatty tartý etemin. Ár beısinbi kúndizgi saǵat 12-00, 16-00 jáne 20-00 sharalarymyz ótedi. 12-00-de aqyn-jazýshylarmen kezdesý bolyp, aqyndardyń kitaptary tanystyrylady. Stýdentter arasynda debat ótedi. Saǵat 16-00-de belgili sportshylarymyzben «juldyzdy gıd» jasaımyz, 20-00-de shyǵarmashylyq kesh ótedi», - dedi ıdeıa avtory, akter Azamat Satybaldy.
Almaty mýzeıi dırektory Nurlan Dúkenbaı bul joba Elbasynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» týraly ıdeıasyna sáıkes keletinin aıtty.
«Týǵan jer» baǵdarlamasy boıynsha Almaty ákimi janynan jospar jasalǵan bolatyn. Sol jospardyń ishinde qamtylǵan sharalardyń bir bóligi - osy joba. Elbasy aıtqan «Ulttyq kodtyń» bir negizi tarıhı jádigerlerimizde jatyr. Qazaqstan jeriniń tarıhı mol. Mýzeıge kelýshiler jádigerlermen tanysa otyryp, el men jerdiń tarıhyn bile túsedi. Bul joba mýzeı aýdıtorııasyn qalyptastyrýdyń dástúrli jobasynan bólek, erekshe tásil. Maqsatymyz mýzeıge kelýshi adamdardyń sanyn ulǵaıtý», - dedi Nurlan Dúkenbaı.
Nurlat Dúkenbaıdyń aıtýynsha, Almaty mýzeıinde Qazaqstanda alǵash ret múgedek jandarǵa arnalǵan ekspozıtsııa jasalǵan. Naqtyraq aıtqanda, múgedek jandarǵa, ásirese zaǵıptarǵa tarıhı jádigerlerdi, eksponattardy qolymen ustap kórýine ruqsat etilgen.