Almatynyń óńirlik startap habqa aınalar múmkindigi joǵary - Á. Isekeshev
Bul týraly búgin Almaty qalasy ákimdiginde qala basshysy Baýyrjan Baıbektiń tóraǵalyǵymen ótken iskerlik keńes barysynda QR Investıtsııalar jáne damý mınıstri Áset Isekeshev málim etti.
«Álemdik ekonomıka qazir shıkizat baǵasynyń arzandaýy jáne ótkizý naryǵynyń tarylýyna baılanysty jańa uzaq merzimdi damý kezeńine ótip jatyr. Bul jaǵdaıda Elbasy Nursultan Nazarbaev Úkimetke birneshe baǵytta jumys isteý kerektigin tapsyrdy. Solardyń ishinde negizgi baǵyt - Ulty jospary - 100 naqty qadamdy júzege asyrý. Almatyǵa qatysty jobalar kóp. Olar - kólik salasyn damytý, Úlken Almaty aınalma tas joly qurylysy, halyqaralyq avıatsııalyq hab qalyptastyrý, týrızm jáne basqa da jobalar. Sonymen qatar, aldaǵy jyldan bastap «Nurly jol» baǵdarlamasyn júzege asyrý aıasynda Almaty men Astana qalalary arasynda magıstraldyq jol salýǵa arnalǵan «Soltústik-Ońtústik» jobasyn júzege asyrý qolǵa alynady. Budan basqa, ındýstrııalyq aımaqtar men ınnovatsııalyq klasterdi damytýǵa kúsh salynady. Bul jobalar boıynsha Almaty ákimdigimen tyǵyz baılanysta jumys isteıtin bolamyz», - dedi Á. Isekeshev.
QR Investıtsııalar jáne damý mınıstri Áset Isekeshev 2016 jyly «Innovatsııalyq tehnologııalar parki» Arnaıy ekonomıkalyq aımaǵyn damytýdyń ekinshi kezeńin aıaqtaý josparlanyp otyrǵandyǵyn jetkizdi.
«Munda tehnologııalardy damytý boıynsha transulttyq kompanııalardyń qatysýymen 2018 jylǵa deıin 5 ortalyq ashylady. Olar jańa tehnologııalar, aqyldy orta, elektrondy kommertsııa, kommýnıkatsııalyq tehnologııa syndy baǵyttarda jumys atqarady. Árıne, jańa jumys oryndary ashylady. Jalpy, Qazaqstan boıynsha ǵylymı-zertteý ınstıtýttarynyń 50 paıyzy Almatyda ornalasqan. Sondyqtan, qalanyń óńirlik startap habqa aınalar múmkindigi joǵary», - dedi Á. Isekeshev.