Almatynyń Naýryzbaı aýdanynda aýyzsý máselesi qalaı sheshilip jatyr

ALMATY. QazAqparat- Almaty ákimi Naýryzbaı aýdany, Aqjar shaǵynaýdanyndaǵy sýmen jabdyqtaýǵa arnalǵan kaskadty sorǵy stantsııasynyń jumysymen tanysty, dep habarlaıdy QazAqparat tilshisi.

Shahar basshysynyń aıtýynsha, Naýryzbaı aýdanynda sýmen qamtamasyz etý problemasy aýdan aýmaǵy megapolıske qosylǵannan keıin paıda boldy.

«Bul másele 10 jyldan astam ýaqytqa sozylyp keldi. Búginde sorǵy stantsııasy salyndy. Basty mindet – turǵyndardy turaqty aýyz sýmen qamtamasyz etý. Biz júzege asyryp jatqan jobalar turǵyndar taýdaǵy sý kózine táýeldi bolmaýyn sheshýge múmkindik beredi», – dedi Erbolat Dosaev.

Qurylys jumystary osy jyldyń mamyr aıynda bastaldy. 1 tamyzda stantsııa paıdalanýǵa berildi. Qazirgi ýaqytta sý berý shtattyq rejımde júzege asyrylýda.

«Aqjar» sorǵy stantsııasy Aqjar shaǵynaýdanyn sýmen jabdyqtaýdy qamtamasyz etedi. Negizgi tehnologııalyq tsıkl «Premera» sorǵy stantsııasynan bastalady. 1 tamyzdan bastap Tashkent kóshesinen Jandosov kóshesine deıin sý berildi. Sondaı-aq Aqjar shaǵynaýdanynda sý jáne káriz jelilerin tóseý jumystary júrgizilýde, olar 80% oryndaldy. Jumystardy qyrkúıek aıynyń sońyna deıin aıaqtaýdy josparlap otyrmyz», – dedi Energetıka jáne sýmen jabdyqtaý basqarmasynyń basshysy Talǵat Malybaev.

16 tamyzdaǵy jaǵdaı boıynsha Aqjar shaǵynaýdanynda 3600-ge jýyq jeke úı, sondaı-aq kópqabatty turǵyn úı qurylysy men bilim berý mekemeleriniń ǵımaraty jyl boıy sýǵa úzdiksiz qol jetkizdi.

Sýmen jabdyqtaýdyń jańa jelilerin salý boıynsha qurylys-montaj jumystarynyń aıaqtalýyna qaraı birqatar kósheniń abonentteri qosylady.

Nysan jobalyq qýattylyqqa shyqqannan keıin 22 myńnan astam turǵyny bar shaǵynaýdannyń 5 myńǵa jýyq úıi aýyz sýmen qamtamasyz etildi. 2023 jyldyń sońyna deıin Qarǵaly ózeninde jańa súzgi stantsııasynyń qurylysy, 2025 jyldyń sońyna deıin Aqsaı ózeninde osyndaı súzgi stantsııasynyń qurylysy aıaqtalady.

Bul Naýryzbaı aýdanynyń jáne Almaty oblysynyń 150 myń turǵynyn turaqty sýmen qamtamasyz etýge múmkindik beredi.

«Tereńdigi 300 metr 5 skvajına burǵylandy, sorǵy stantsııasy ornatyldy jáne Alataý-Abaıdyń ekinshi kótergish sorǵysyna sý jınaldy. Munda 5-10 myń tekshe metr sý jınaıtyn eki rezervýar salyndy. Sondaı-aq Aqjarǵa sý jiberetin sorǵy stantsııasy ornatyldy. Sýmen úzdiksiz qamtamasyz etý úshin táýlik boıyna saǵatyna 360 tekshe metr sý jiberemiz. Bul sorǵy stantsııasy qazir toqtaýsyz jumys isteıdi», – dedi «Qazaq Stroy Almaty» JShS bas energetıginiń orynbasary Tólegen Janǵurbaev.

Júrgizilgen jumys barysyn tekserýdi qorytyndylaǵan qala ákimi Erbolat Dosaev aýdan turǵyndaryn sapaly jáne úzdiksiz sýmen qamtamasyz etý jumysyn erekshe baqylaýda ustaýdy tapsyrdy.