Almatynyń Medeý, Bostandyq, Naýryzbaı aýdandarynda adamdy kene shaǵý qaýpi joǵary

ALMATY. QazAqparat – Kene entsefalıtin aldyn alýdyń basty qaǵıdasy – vaktsınatsııa. Bul týraly óńirlik kommýnıkatsııalar qyzmeti alańynda Almaty qalalyq qoǵamdyq densaýlyq saqtaý basqarmasynyń shtattan tys epıdemıology Elvıra Ibragımova aıtty, dep habarlaıdy QazAqparat tilshisi.

Spıkerdiń sózinshe, kene entsefalıtine qarsy egý adamǵa 18 jastan bastap júrgiziledi. Oǵan kene entsefalıtiniń endemııalyq aýmaǵynda turatyn adamdar nemese sol jerde júretin, kene entsefalıti vırýsymen jumys isteıtin medıtsına qyzmetkerleri jatady.

«Vaktsınatsııa kestesi 1-den 7-aıǵa deıingi aralyqta eki egilýden jáne bastapqy vaktsınatsııa kýrsy aıaqtalǵan soń, 12 aıdan keıingi revaktsııantsııalaýdan turady. Birinshi ınektsııany kúzgi kezeńde (qazan-qarasha), ekinshisin bir, eki aıdan keıin jasaǵan durys», - dedi Elvıra Ibragımova.

Eresekter men balalarǵa kene entsefalıtine qarsy adam ımmýnoglobýlıni qoldanylady. Kene entsefalıtimen aýyrǵandar eki jyl nemese odan uzaq ýaqyt boıy dıspanserlik baqylaýdan ótýi tıis.

«Keneniń shaǵýynan zardap shekken adamdardy dıspanserlik baqylaý - turǵylyqty jeri boıynsha medıtsınalyq uıymda 21 kún boıy turaqty termometrııa arqyly júrgiziledi», - dedi spıker.

Onyń aıtýynsha, Almaty qalasy – kene entsefalıtiniń endemııalyq aımaǵy.

«Tájirıbede keneler kóbine naýryzdan qyrkúıekke deıin belsendi bolatynyn, ıaǵnı osy ýaqtta olardyń adamdardy kóp shaǵatynyn kóremiz. Kene entsefalıtiniń aldyn alý ásirese taýly aımaqtarda nemese saıajaılar aýmaǵynda turatyn turǵyndar úshin ózekti. Qalada oǵan Medeý, Bostandyq, Naýryzbaı aýdandary jatady», - dedi epıdemıolog.

Ol sondaı-aq kene shaqqan jaǵdaıda onyń antıgendik quramyn (AG quramy) Ulttyq sanıtarlyq-epıdemıologııalyq qadaǵalaý jáne saraptama ortalyǵynda tekserý qajet ekenin aıtty. Saraptama aqyly túrde júrgiziledi.

Aıta keteıik, kene shaqqan kezde tómendegi statsıonarlarǵa medıtsınalyq kómekke júginý bolady:

- №4 qalalyq klınıkalyq aýrýhana (Papanın kóshesi, 220);

- №7 qalalyq klınıkalyq aýrýhana (Qalqaman shaǵyn aýdany, 20);

- Ortalyq qalalyq klınıkalyq aýrýhana ( Jandosov kóshesi, 6);

- Jedel medıtsınalyq kómek kórsetý qalalyq aýrýhanasy (Qazybek bı kóshesi, 96);

- Balalar jedel medıtsınalyq kómek kórsetý aýrýhanasy (Manas kóshesi, 40).