Almatynyń mamandandyrylǵan HQO-larynda kezek bolmas úshin qosymsha 48 tereze ashyldy

ALMATY. QazAqparat – Almatynyń mamandandyrylǵan HQO-larynda avtokólik ıelerinen kezek paıda boldy. «Azamattarǵa arnalǵan úkimet» memlekettik korporatsııasy Almaty qalalyq fılıalynyń baspasóz qyzmeti qabyldanyp jatqan sharalar týraly málimdedi, dep habarlaıdy QazAqparat tilshisi.

Kezekti azaıtý maqsatynda sheteldik kólikterdi zańdastyrýǵa ótinish qabyldaý úshin qosymsha 48 tereze ashylǵan.

«Basqa bólimderdiń qyzmetkerleri tartyldy, kúsheıtilgen jumys rejımi engizildi. Máselen, №1 mamandandyrylǵan HQO-daǵy sheteldik kólikterdi zańdastyrý boıynsha qujat qabyldap otyrǵan 10 qyzmetker 42 adamǵa ulǵaıtyldy. №2 MHQO 8 tereze ornyna 16 tereze jumys istep tur. №5 MHQO-da 10-nan 12 terezege jáne №6 MHQO-da 9-dan 15 terezege ulǵaıtyldy», - dep habarlady «Azamattarǵa arnalǵan úkimet» memlekettik korporatsııasy Almaty fılıalynyń baspasóz qyzmeti.

Sondaı-aq, baspasóz qyzmeti kólikti zańdastyrý úshin eGov.kz portaly jáne ekinshi deńgeıli bankterdiń mobıldik qosymshalary arqyly berilgen ótinimder 1 shildeden keıin de ýákiletti organda qaralatyndyǵyn eske saldy.

«Avtokólik ıelerine aıtar keńesimiz, mamandandyrylǵan HQO-ǵa kelip ýaqytyńyzdy ketirmeı, úıde otyryp onlaın ótinish berip, maquldaý alǵan soń ǵana mamandandyrylǵan HQO-ǵa kelińiz», - dep eskertti «Azamattarǵa arnalǵan úkimet» memlekettik korporatsııasynyń Almaty qalalyq fılıalynan.

Eske salaıyq, ótken aıda da Almatydaǵy avtoHQO-larda uzyn-sonar kezek paıda bolǵan edi.

Buǵan deıin habarlanǵanyndaı, sheteldik avtokólikterdi zańdastyrý merziminiń aıaqtalýyna az ýaqyt qalýyna baılanysty mamandandyrylǵan HQO-lar kúsheıtilgen jumys rejımine kóshti.