Almatynyń ınjenerlik ınfraqurylymy jańǵyrtýǵa muqtaj

ASTANA. QazAqparat – Jyl sońyna deıin Almatynyń 50 myń turǵyny ortalyqtandyrylǵan sýmen qamtamasyz etiledi. Bul týraly qala ákimi Erbolat Dosaev aıtty, dep habarlaıdy QazAqparat tilshisi.

«2025 jyldyń sońyna deıin Memleket basshysynyń qalanyń barlyq turǵyndaryn sapaly aýyz sýmen qamtamasyz etý tapsyrmasy qarqyndy iske asyrylady. Bul maqsatta osy jyldyń qazan aıynda Naýryzbaı aýdanynyń shyǵys bóligindegi Qarǵaly ózeninde sý jınaý qurylǵysyn salý aıaqtalady jáne 50 myń turǵyn sapaly sýǵa qol jetkizedi», - dedi qala basshysy elordada ortalyq kommýnıkatsııalar qyzmetinde.

Onyń aıtýynsha, Naýryzbaı aýdanynyń batys bóliginiń 100 myńǵa jýyq turǵynyn qamyp, Aqsaı ózeninde sý jınaý qurylǵysyn salý jalǵasady.

Aıaqtalý merzimi – 2025 jylǵy qarasha.

«Jalpy ónimdiligi táýligine 50 tekshe metrden asatyn Ermensaı jáne Barlyq ózenderinde 2 sý jınaý qurylǵysynyń qujattamalary ázirlenýde. Bul kózder qalanyń 2 aýdanynyń 100 myńnan astam turǵynyn sýmen qamtıdy. Qabyldanyp jatqan sharalardyń arqasynda 2025 jylǵa qaraı 250 myńnan astam adam, onyń ishinde bıyl 50 myń adam ortalyqtandyrylǵan sýǵa qol jetkize alady», - dedi Erbolat Dosaev.

Sondaı-aq, ákim Almatyda ınjenerlik ınfraqurylymdy eleýli jańǵyrtý qajettigin jetkizdi.

«Bıyl «Almagúl» jáne «Tuzdybastaý» 2 elektr qosalqy stantsııalary paıdalanýǵa beriledi. 400 myńǵa jýyq turǵyn turaqty elektrmen jabdyqtalady. 300 myń tutynýshyny jylýmen qamtý úshin qyrkúıek aıynda qýaty 155 Gkal 2 qazandyqty – «Ońtústik aýdandyq qazandyq» jáne «Premerdi» qaıta jańǵyrtý aıaqtalady», - dep tolyqtyrdy spıker.