Almatynyń ınvestıtsııalyq tartymdylyǵyn qalaı kóterýge bolady

ASTANA. QazAqparat - Quqyqtyq statıstıka ádistemesin ózgertý arqyly Almatynyń ınvestıtsııalyq tartymdylyǵyn arttyrýǵa bolady. Bul týraly búgin «Quqyq qorǵaý organdary qyzmetiniń ashyqtyǵy» atty konferentsııa barysynda  QR Bas prokýratýrasy janyndaǵy Quqyqtyq statıstıka komıteti tóraǵasynyń orynbasary Baqyt Ábishev aıtty, dep habarlaıdy QazAqparat tilshisi.

«Quqyqtyq statıstıka qalaı qalyptastyrylady? 2015  jyldan bastap Qylmystyq is júrgizý kodeksinde sotqa deıingi tergeýdiń biryńǵaı tiziliminiń normasy bar. Barlyq aryzdar avtomatty túrde tirkeledi.  Osy turǵyda Qazaqstan Qyrǵyzstan, Ózbekstan jáne ózge de elderdi zerdeleýde. Mundaı eshqandaı problema joq. Barlyq aryz avtomatty túrde júıege tirkeledi», - dedi ol.

Tóraǵa orynbasarynyń aıtýynsha, komıtette barlyq statıstıka tolyqtaı bar. Degenmen, ásirese quqyq qorǵaý organdary tarapynan aryzdardy manıpýlıatsııalaý faktileri kezdesip jatady.

«Bul qalaı oryn alady? Aıdyń sońynda, sońǵy esep berý kúninde olar zańsyz qaıta jiktelim jasaıdy. Ókinishke oraı, mundaı faktiler óte kóp. Bul - problema. Barlyǵymyz da biletindeı, ishki ister organdaryna úlken reforma jasalǵaly jatyr. Osy rette ózge damyǵan elderdiń statıstıkany qalyptastyrýdaǵy halyqaralyq tájirıbesin zerdeleý qajet. Vedomstvomyzdyń aıasynda aqparattar bolǵanymen ol jetiliksiz. Damyǵan elderde qylmysqa qatysty esepter bizge qaraǵanda ózgeshe júrgiziledi. Biz ótken jylǵy kórsetkishpen salystyramyz. Al BUU jáne ózge sheteldik uıymdardyń ádistemesi boıynsha 10 myń nemese 100 myń dep halyq sany boıynsha esepteıdi», - dedi Baqyt Ábishev.

Onyń aıtýynsha, sheteldik ádisteme arqyly eseptegende bizdegi qylmystylyq deńgeıine qatysty kórsetkish ózgerip shyǵa keledi.

«Máselen, eski ádisteme boıynsha Almaty qylmys boıynsha birinshi orynda tursa, jańa ádistememen eseptegende ortasyna qaraı yǵysady. Bul kóptegen máseleni sheshedi. Eń aldymen bul - azamattardyń qaýipsizdigi men qalanyń ınvestıtsııalyq tartymdylyǵy», - dedi ol.