Almatynyń erekshe qorǵalatyn tabıǵı aımaqtarynda ot jaǵýǵa bolmaıdy
Bul týraly Almaty qalasynyń tótenshe jaǵdaılar departamenti basshysynyń orynbasary Samat Asaınov aıtty, dep habarlaıdy QazAqparat tilshisi.
«Almaty qalasynyń erekshe qorǵalatyn tabıǵı aımaqtary aýmaǵynda jáne belgilenbegen jerde ot jaqqany úshin Orman sharýashylyǵy mekemeleriniń qyzmetkerleri QR «Ákimshilik quqyq buzýshylyq týraly» Kodeksiniń 367-baby boıynsha ákimshilik aıyppul salýǵa ýákiletti ekenin atap ótkim keledi. Bul rette jeke tulǵalarǵa 10-nan 100 AEK-ke deıin, ıaǵnı, 30 myń 630 teńgeden bastap 306 myń 300 teńge deıin aıyppul salynýy múmkin.
Demalýshylardyń nazaryna aıta keteıin, qazirgi ýaqytta Almaarasan shatqalynyń aýmaǵynda, Úlken Almaty, Kazachka ózenderiniń boıynda ystyq tamaq daıyndaý úshin arnaıy jabdyqtalǵan oryndar (oryndyq, ústel, ot jaǵýǵa arnalǵan betondalǵan alań, mangaldar, barbekıý jáne t.b.) bar», - dedi Samat Asaınov.
Sondaı-aq, ol qala turǵyndary men qonaqtaryna taýly-ormandy jerlerde órt qaýipsizdigi erejelerin saqtaýǵa shaqyrdy.
«Belgilengen orynda ot jaqpańyz, mangaldar men tamaq daıyndaýǵa arnalǵan basqa da quraldardy paıdalanbańyz, belgilenbegen oryndarda temeki shekpeńiz, janyp turǵan sirińke, temeki tuqylyn laqtyrmańyz, taýly-ormandy jerde benzın, kerosın jáne ózge de janǵysh zatpen maılanǵan materıaldy qaldyrmańyz, kún sáýlesi túsetin orman alańynda bótelke, shyny synyqtary men basqa da qoqystardy qaldyrmańyz, qurǵaq shópti órtemeńiz. Órt qaýipsizdigi erejelerin saqtańyz», - dedi ol.