Almatynyń epıdemııalyq ahýalyna baılanysty qala ákimi men densaýlyq mınıstri jıyn ótkizdi
Keńesti ashqan Baqytjan Saǵyntaev KVI pandemııasymen kúres aıasynda qalanyń densaýlyq saqtaý júıesin kúsheıtý boıynsha sharalar qabyldanǵanyn atap ótti. Jańǵyrtýdyń úsh jyldyq josparyna sáıkes medıtsınalyq jabdyqtardy jańartý, ınfektsııalyq statsıonarlarǵa medıtsınalyq gaz ornatý, sarqyndy sýdy zararsyzdandyrý men medıtsınalyq qaldyqtardy kádege jaratý syndy keshendi jumystar júrgizilýde.
Sondaı-aq, shahar basshysy ótken jyly KVI bar naýqastardy anyqtaý jáne olardy aýrýhanaǵa jatqyzý boıynsha algorıtmniń ázirlenip, engizilgenin, AMSK jáne ambýlatorııalyq emdeýde asımptomatıkalyq naýqastardy baqylaý boıynsha telemedıtsına ortalyǵynyń jumysy qurylǵanyn atap ótti. Infektsııalyq tósek-oryndardyń qajetti rezervi quryldy. Dárihana jelisi men kovıdtik gospıtaldar úshin dárilik turaqtandyrý qory jumys isteıdi.
Baqytjan Saǵyntaevtyń aıtýynsha, qabyldanyp jatqan sharalar jaǵdaıdy basqarýǵa, qalanyń densaýlyq saqtaý júıesine túsetin júktemeniń shamadan tys bolýyna jol bermeýge jáne statsıonarlarǵa júktemeni eshelondaý qaǵıdaty boıynsha bólýge múmkindik beredi.
Memleket basshysy alǵa qoıǵan mindetterdi oryndaý maqsatynda medıtsınalyq-sanıtarııalyq alǵashqy kómek jumysyn kúsheıtý, ana men balany qorǵaý, onkologııalyq aýrýlar men qan aınalymy júıesi aýrýlary kesirinen bolatyn ólim-jitimdi azaıtý boıynsha sharalar qabyldanýda. Sonymen qatar, qala ákimi B. Saǵyntaevtyń tapsyrmasy boıynsha kórsetiletin medıtsınalyq kómektiń sapasyn arttyrý jáne medıtsına qyzmetkerleriniń kadr tapshylyǵyn sheshý boıynsha Jol kartasy ázirlendi.
Almaty qalasy ákiminiń orynbasary Erjan Babaqumarov rezervtik tósek-oryndardy kovıdterge josparly túrde aýystyrý algorıtmi qurylǵanyn aıtty.
Qýattylyǵy 7011 tósekti quraıtyn 28 kovıdtik klınıka jáne 250 reanımatsııalyq klınıka daıyndaldy. Búginde 5000 ınfektsııalyq jáne 220 reanımatsııalyq tósek-oryn jumys isteýde. RV-90 qalalyq juqpaly aýrýlar aýrýhanasynyń fılıaly paıdalanýǵa berildi.
Jalpy qýaty 1080 oryndy eki jańa modýldik klınıka salyndy. Mundaı tósek-oryn qory táýligine 500-ge deıin naýqasty aýrýhanaǵa jatqyzýdy kózdeıdi. Qalanyń barlyq medıtsınalyq uıymdarynda úı-jaılardy aımaqtarǵa bólý júrgizildi. Bul aýrýhanaishilik ınfektsııany boldyrmaıdy.
Pandemııamen kúrestiń mańyzdy quramdas bóligi shuǵyl kómekti qajet etpeıtin qala turǵyndaryna qashyqtan keńes berý arqyly kómek kórsetý úshin qurylǵan telemedıtsına ortalyǵynyń jumysyn aıtýǵa bolady. Búginde sımptomsyz jáne jeńil KVI aǵymy bar 2,5 myńǵa jýyq adam operatorlarǵa táýlik boıy keńes berýmen jáne medıtsınalyq qoldaýmen qamtylǵan. Patsıentterdi ambýlatorııalyq baqylaý boıynsha qalalyq emhanalardyń mobıldi brıgadalarynyń jumysy jolǵa qoıyldy. Qala boıynsha 768 top jumyldyryldy. Kadrlyq rezerv qalyptasty. Juqpaly aýrýlar statsıonarlarynda 2000-ǵa jýyq medıtsına qyzmetkeri jumys isteıdi. Rezervte – 2758 medıtsına qyzmetkeri bar
Almatyda klınıkalardy medıtsınalyq ottegimen qamtamasyz etýdiń jalpyqalalyq baǵdarlamasy qabyldandy. Maqsaty – qalanyń 16 emhanasyn ottegimen 100% jabdyqtaý. 2020 jyly 6 klınıka ottegimen tolyq jabdyqtalsa, bıyl taǵy 10 klınıkada ottegi stansalary bolady.
Densaýlyq saqtaý mınıstri Alekseı Tsoı Almatyda densaýlyq saqtaý qyzmetin damytý jáne COVID-19-ǵa qarsy kúres modeli elimizdiń basqa óńirlerine taralatynyn atap ótti. Mysaly, medıtsınalyq kómek kórsetý standarttaryn saqtaı otyryp, tósekterdiń aınalymyn jáne bosatylýyn qamtamasyz etýge múmkindik beretin statsıonarlardy eshelondaý; aýrýdyń jeńil aǵymy bar asımptomatıkalyq jáne naýqastardy baqylaýǵa múmkindik beretin telemedıtsına ortalyǵynyń jumysy. Mundaı ortalyq basqa óńirlerde joq.
Sonymen qatar, mınıstr sońǵy jyly jedel járdem avtoparkin 70%-ǵa jańartý, sondaı-aq sońǵy 20 jylda Almatynyń medıtsınalyq mekemelerinde bolmaǵan ottegi stansalaryn qosý jónindegi jumystyń mańyzdylyǵyn atap ótti. Sonymen qatar, A. Tsoı sáýir aıynda KVI-ǵa qarsy vaktsına dozalarynyń jańa partııasy jetkiziletinin habarlady.
Sondaı-aq jıynda Densaýlyq saqtaý vıtse-mınıstri A. Ǵınııat, QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy A.Esmaǵambetova, Qalanyń bas memlekettik sanıtarlyq dárigeri, Almaty qalasy sanıtarlyq-epıdemıologııalyq baqylaý departamentiniń basshysy J. Bekshın, Almaty qalasy Qoǵamdyq densaýlyq basqarmasynyń basshysy N. Tabynbaev, telemedıtsına ortalyǵynyń basshysy L. Myrzaǵalı, Almaty qalasy JMJS dırektorynyń mindetin atqarýshy P. Nadyrov sóz sóıledi.
Jıyn qorytyndysy boıynsha QR Densaýlyq saqtaý mınıstri A. Tsoı COVID-19-ǵa qarsy kúres jónindegi jumysty odan ári jalǵastyrý máseleleri boıynsha birqatar tapsyrmalar berdi.