Almatynyń eki mıllıonynshy turǵyny Aıala Jambyldyń otbasy baspanaly boldy

ALMATY. QazAqparat - Megapolıstiń eki mıllıonynshy turǵyny Aıala Jambyldyń otbasy qonys toıyn toılaıdy. Qala kúni olarǵa Almaty qalasynyń ákimi Baqytjan Saǵyntaev jańa páterdiń kiltin tapsyrdy, dep habarlaıdy QazAqparat tilshisi.

Aıala Jambyl 2021 jyly 21 maýsymda dúnıege keldi jáne Ulttyq statıstıka bıýrosynyń málimeti boıynsha ol Almatynyń eki mıllıonynshy turǵyny boldy.

Mereke kúni qala ákimi Baqytjan Saǵyntaev Aıalanyń ata-anasyna Naýryzbaı aýdanyndaǵy «Alma Sıtı-5» turǵyn úı keshenindegi úsh bólmeli jańa páterdiń kiltin tapsyrdy.

Qala ákimi otbasyna zor densaýlyq, baqyt pen bereke tiledi.

Qala kúni alty bala ósip kele jatqan Jambyl otbasy úshin qýanyshty kúnge aınaldy. Jergilikti atqarýshy organdardyń qoldaýynyń arqasynda kópbalaly otbasynyń jeke baspana týraly armany oryndaldy.

Eki mıllıonynshy almatylyq Aıala Jambyl polıtsııa qyzmetkeri Beıbit Ábildaev pen balabaqsha tárbıeshisi Álııa Janybekovanyń otbasynda dúnıege keldi. Ol otbasyndaǵy altynshy qyz.

Buǵan deıin kópbalaly otbasy «Qarǵaly» shaǵynaýdanynda ata-anasynyń úıinde turǵan.

«Ana retinde balalarymnyń týǵan kúnderi eń baqytty sát bolsa, al búgin páter kiltin alý eshqashan umytylmaıtyn eń baqytty kún. Biz qaladan mundaı syılyq alamyz dep kútpegen edik», - dedi Álııa Janybekova.

Aıta keteıik, Almatyda jyl basynan beri kómekke muqtaj 2 340 otbasy jeńildetilgen nesıe aıasynda turǵyn úımen qamtamasyz etildi.