Almatynyń densaýlyq saqtaý salasyna bıyl 35 mlrd teńge ınvestıtsııa tartyldy

ALMATY. QazAqparat – Medıtsına qyzmetkerleri kúni qarsańynda Almaty qalasynyń densaýlyq saqtaý mekemelerinde úzdik eńbek etip júrgen birqatar maman túrli nagradalarmen marapattaldy, dep habarlaıdy QazAqparat tilshisi.

Atap aıtar bolsaq, densaýlyq saqtaý mınıstrliginiń «Eńbek ardageri» belgisi, «QR densaýlyq saqtaý isine qosqan úlesi úshin» jáne «QR densaýlyq isiniń úzdigi» tósbelgileri men qala ákimniń alǵys hattary tabys etildi.

Erbolat Dosaev dárigerlerdi kásibı merekesimen quttyqtap, halyqtyń densaýlyǵyn saqtaý jáne azamattardyń ómiri úshin kúresý jolyndaǵy janqııarlyq eńbekteri úshin alǵys bildirdi.

«Medıtsına qyzmetkerleri kúnimen shyn júrekten quttyqtaımyn. Búgin erekshe mereke. Bul mereke aınalasynda qýanysh pen úmit uıalaǵan adamdarǵa arnalǵan. Naýqas jandy emdeý, adam ómirin saqtap qalý – qajyrly jáne qasterli is. Sizder adamdarǵa úmit syılaısyzdar, olardyń densaýlyǵy men baqytty bolýy úshin qoldan kelgenniń bárin jasaısyzdar degen senimdemin. Sabyrlyq, meıirimdilik, kásipqoılyq qyrlaryńyz arta bersin. Qıyn jáne mártebeli eńbekterińiz úshin zor alǵys bildiremin», - dedi Erbolat Dosaev Abaı atyndaǵy memlekettik akademııalyq opera jáne balet teatrynda ótken saltanatty jıynda.

Almaty ákimi qazirgi ýaqytta densaýlyq saqtaý júıesin jańǵyrtýdyń 2030 jylǵa deıingi keshendi baǵdarlamasyn ázirleý boıynsha jumys júrgizilip jatqanyn jetkizdi. Birinshi kezekte alǵashqy medıtsınalyq-sanıtarlyq kómektiń tıimdiligi men qoljetimdiligin arttyrýǵa kúsh salynady. Infraqurylymdy jańǵyrtý jáne jańa medıtsınalyq qyzmetterdi engizý basty nazarda. Sondaı-aq, kópsalaly aýrýhanalar men basqa da mekemelerge jańa tehnologııalardy engizý kózdelip otyrǵanyn aıtty.

Bıyl Almaty qalasynyń densaýlyq saqtaý júıesine jergilikti bıýdjetten tartylatyn ınvestıtsııanyń jalpy kólemi shamamen 35 mlrd teńgege jetti. Jalpy, qalanyń densaýlyq saqtaý júıesinde 182 medıtsınalyq uıym bar, onda 38 myńnan astam maman jumys isteıdi.