Almatynyń tsıfrlyq sheshimderi «aqyldy qalalar» baıqaýynda úzdik dep tanyldy
Bul baıqaýǵa 2020 jyly 12 elden 40-tan astam joba qatysty. Almatynyń «Sergek» qoǵamdyq jáne jol qozǵalysy júıesi «Kóliktiń ıntellektýaldyq júıesi» nomınatsııasynda birinshi oryndy aldy. Máskeýlik ıntellektýaldyq baǵdarshamdar ekinshi oryndy aldy. Jobalar IDC-tiń arnaıy júldelerimen marapattalyp, 2020 jyldyń «Aqyldy qalalar men qoǵamdastyqtar» jobalarynyń úzdikter jınaǵyna enetin bolady. Jalpy, baıqaý aıasynda bes nomınatsııa boıynsha 15 joba úzdik dep jarııalandy.
«Bizdiń aldymyzda úlken maqsattar turdy, men jobaǵa qatysqandardyń barlyǵyna alǵys aıtamyn. Menińshe, bul baıqaý Orta Azııanyń jańa qurylymdyq júıesin damytýdaǵy tamasha múmkindik ári jasandy ıntellektke negizdeledi. Tek vıdeobaqylaý men vıdeomonıtorıngter ǵana emes, sonymen qatar ıntelektýaldyq ákimshilik qaýipsizdikti qamtamasyz etedi»,- dep atap ótti Almaty qalasy Tsıfrlandyrý basqarmasynyń basshysy Baıan Qońyrbaev.
Jalpy Almaty eki nomınatsııa boıynsha júldege ıe boldy. Onyń ishinde «COVID-19 pandemııasyna jaýap retinde eptilik pen yntymaqtastyqty arttyrý úshin qaýipsizdik málimetterin paıdalanatyn qalalar arasynda» júldesi boıynsha da syılyq aldy.
Qorytyndy tizimge úsh bastama endi. Olar Reın-Nekkar-Kreıs okrýgindegi COVID-19-ǵa qatysty tósek-oryndar basqarmasy, Almatynyń selge qarsy avtomattandyrylǵan monıtorıng júıesi jáne Valensııadaǵy COVID-19 boıynsha biryńǵaı aqparattyq júıe.
«Tsıfrly Qazaqstan» memlekettik baǵdarlamasy aıasynda «Aqyldy qala» strategııasyna sáıkes Almaty qalasy Tótenshe jaǵdaılar departamenti Kishi jáne Úlken Almaty, Qarǵaly jáne Aqsaı ózenderiniń basseınderinde sel monıtorıngin júrgizýdiń avtomattandyrylǵan júıesin engizý boıynsha jumystar júrgizýde. Joba aıasynda «Qazseldenqorǵaý» aýmaqtarynda avtomattandyrylǵan jumys oryndary bar 31 stantsııa salynýda. 2019 jyly 10 ASM stantsııasy iske qosyldy, al qalǵan 21 stantsııany 2021 jyly iske qosý josparlanyp otyr.