Almatynyń Bostandyq aýdanynda jastar resýrstyq ortalyǵy jumysyn bastady

ALMATY. QazAqparat – Almaty qalasy Qoǵamdyq damý basqarmasy men Bostandyq aýdany ákimdiginiń qoldaýymen jastar men jastar uıymdary úshin áleýmettik alań usyný maqsatynda Bostandyq aýdanynda «Almaty jastary» jastar resýrstyq ortalyǵy ashyldy, dep habarlaıdy QazAqparat tilshisi.

Jastar resýrstyq ortalyǵy jastarǵa qyzmet kórsetý ortalyǵy qaǵıdaty boıynsha (jumysqa ornalastyrý, turǵyn úı máselesi, memlekettik baǵdarlama, kásipkerlik jáne t. b.) jumys isteıtin bolady.

Odan bólek, ortalyqta «Atameken» kásipkerlikti qoldaý ortalyǵynyń da mamandary bar. Jumyssyz júrgen jastar osynda kelip keńes alyp, startap jobasyn bastaı alady. Qazir keń aýqymda júrip jatqan baǵdarlamanyń biri «Bıznes bastaý». Kásipker bolýǵa nıetti jan óz jobasyn qorǵap memleketten 505 myń teńge qaıtarymsyz grant ala alady.

Sondaı-aq, qoldanystaǵy memlekettik baǵdarlamalar, jastarǵa arnalǵan múmkindikter jáne qalada júrgizilip jatqan reformalar, jas otbasylar arasynda ajyrasýdyń aldyn alý, NEET sanatyndaǵy jastarmen jumys, jastarǵa anonımdi psıhologııalyq kómek kórsetý, jastar men jastar uıymdaryna quqyqtyq, ádistemelik kómek kórsetý týraly keńester ótkiziledi.

Sonymen qatar, ortalyq qyzmetkerleri Bostandyq aýdanynyń jastaryna kolledjder men joǵary oqý oryndaryna túsý, jataqhana alý máseleleri boıynsha keńes beretin bolady.

Qyzmet kórsetý sapasyn jaqsartý úshin call-ortalyq qurylady, ol aýdan jastaryna onlaın rejımde keńes beredi.

Aıta ketý kerek, búgingi tańda qalanyń barlyq aýdanynda «shetsiz qala» qaǵıdaty boıynsha ońtústik astanany damytý sheńberinde Jastar resýrstyq ortalyǵy ashyldy.