Almatynyń biregeı kelbeti saqtalady: Qalada qurylys júrgizýdiń jańa erejesi qabyldandy

ALMATY. QazAqparat- Almaty qalalyq josparlaý jáne ýrbanıstıka basqarmasynyń bastyǵy Almashan Ahmedjanov onlaın brıfıng barysynda VII shaqyrylǵan qala máslıhatynyń kezekten tys VI sessııasynda qabyldanǵan jańa qurylys erejelerin tanystyrdy, dep habarlaıdy QazAqparat tilshisi.

Jańa talaptar megapolıstegi qurylysty shekteıdi, ǵımarattardyń bıiktigin jáne salynatyn qurylystyń tyǵyzdyǵyn anyqtaıdy jáne ınfraqurylymdy damytý boıynsha talaptar qoıady.

«Almaty ákimi Baqytjan Saǵyntaevtyń tapsyrmasy boıynsha «Qalanyń sáýlettik kelbetin qalyptastyrý jáne qala qurylysyn josparlaý erejeleri» ázirlendi. Bıylǵy jyldyń 17 aqpanynda qujat jobasy Almatynyń bas josparyna enetin túzetýler jobasy boıynsha jumys tobyna qatysýshylardyń talqylaýyna usynyldy. 25 naýryzda joba NQA portalynda jarııalanyp, kópshilikke usynyldy», - dedi Almashan Ahmedjanov.

Talqylaý barysynda qala qurylysy búkil qatysýshynyń pikiri eskerildi. Sonymen birge, megapolıs qurylysyna qoıylatyn bazalyq talaptar saqtaldy.

Qujattyń maqsaty - qalanyń sáýlettik-keńistiktik damýyn quqyqtyq retteý.

Qujat turǵyn aýdandar men shaǵyn aýdandardaǵy halyqtyń tyǵyzdyǵyna qoıylatyn talaptardy, sondaı-aq kóppáterli turǵyn úılerdiń uzyndyǵy araqashyqtyǵynyń az mólsherin anyqtaıdy.

3-5 qabatty úılerde araqashyqtyq kem degende 20 metr, 10-16 qabatty úılerde kem degende 48 metr, al 17 jáne odan joǵary qabattarda 80 metrge deıin ósedi.

«Memleket basshysynyń megapolısti damytý jónindegi tapsyrmasyna oraı erejede Almatynyń biregeı arhıtektýralyq kelbetin jáne ár qalalyq úshin jasyl jelek sanyn saqtaý erekshe oryn alady. Bular jańa erejede jazylǵan», - dedi spıker.