Almatynyń basym bóliginde 9 qabattan joǵary ǵımarattar salynbaıdy

ALMATY. QazAqparat – Almaty ákimdigi qalanyń fýnktsıonaldyq aımaqtaryn damytý úshin qurylys reglamentterin jańartty, dep habarlaıdy QazAqparat tilshisi.

Almaty ákimi Erbolat Dosaev máslıhat otyrysynda Abaı dańǵylynyń ońtústigindegi, ál-Farabı dańǵylynyń soltústigi, Áshimov kóshesiniń shyǵysy jáne Shyǵys aınalma jolynyń shyǵys jaǵyndaǵy turǵyn úılerdiń bıiktigin shekteýdi usyndy. Ol úshin 9 qabatqa deıin aýyspaly qabattar sanyna reglament belgileýge bolady.

Almaty qalasy ákiminiń orynbasary Muhıt Ázirbaevtyń aıtýynsha, qoldanystaǵy erejeler júzinde bul aýmaqtarda 12 jáne odan da kópqabatty turǵyn úıler salýǵa ruqsat bar.

«Tyǵyzdyqty azaıtý maqsatynda atalǵan kóshelerdiń aýmaǵyndaǵy jańa turǵyn úıler qurylysy 3-sanatty jaılylyqtan tómen bolmaýy kerek», - dedi ákim orynbasary.

Onyń aıtýynsha, jobada ákimshilik nysandarmen qatar turǵyn úı salý qarastyrylǵan kezde, qosymsha norma aralas dep atalatyn keshendi qurylysta 9 qabattan joǵary ǵımarattar salýǵa ruqsat beredi. Bul jaǵdaıda turǵyn úı kólemi jobanyń jalpy alańynyń 30%-ynan aspaýy kerek.

«Qala qurylysy erejelerin iske asyrý josparyna engizilip jatqan ózgeristerdi qoldaýyńyzdy suraımyn, ony qabyldaý arqyly qalanyń joǵarǵy bóligindegi qurylys tyǵyzdyǵyn azaıtamyz, taý bókterinde turatyn turǵyndardy qorǵaımyz», - dedi Muhıt Ázirbaev.

Buǵan deıin habarlanǵandaı, Almatyda halyq sanynyń ósýi men oqýshy ornynyń tapshylyǵyna baılanysty 5 jańa mektep salynbaq.

Sondaı-aq, qalada taý betkeıinde qurylys júrgizýge tyıym salyndy.