Almatynyń aýdandyq ákimdikterine jekelegen fýnktsııalardy iske asyrý úshin 100 mlrd teńge bólinedi

ALMATY. QazAqparat – Aýdan ákimdikterine birqatar jekelegen fýnktsııalar berilip, bıýdjetti birinshi naqtylaý kezinde shamamen 100 mlrd teńge bólinedi. Bul týraly Almaty qalasynyń ákimi Erbolat Dosaev Alataý aýdany turǵyndarymen kezdesýinde aıtty, dep habarlaıdy QazAqparat tilshisi.

Ótken jyly Almaty ákimdigi jekelegen fýnktsııalardy aýdandyq ákimdikterge berý týraly bastama kóterip, usynysqa Prezıdent qoldaý bildirdi.

«Memleket basshysy respýblıkalyq mańyzy bar qalalar men elordada ornalasqan aýdan ákimdikterine 15 fýnktsııany berý týraly QR Bıýdjet kodeksindegi túzetýlerge qol qoıdy. Bıyl qalalyq bıýdjetti birinshi naqtylaý kezinde Almatynyń aýdandaryna shamamen 100 mlrd teńge, onyń ishinde Alataý aýdanyna 17,3 mlrd teńge beriledi», - dedi Erbolat Dosaev.

Ákimniń aıtýynsha, joldar, ınjenerlik jelilerdi jóndeý, mektepke deıingi tárbıe men oqytýdy, áleýmettik qyzmetterdi, shyǵarmashylyq úıirmeler men sport sektsııalaryn qarjylandyrý jáne basqa da jumystarmen aýdandyq ákimdikter aınalyspaq.

«Ortalyqsyzdandyrý jumysy aýdandyq ákimdikterge jetkilikti qarjy resýrsyn bólýge múmkindik beredi jáne aýdan ákimderiniń halyq aldyndaǵy jaýapkershiligin aıtarlyqtaı arttyrady», - dedi Erbolat Dosaev.

Aıta ketsek, 30 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.