Almatynyń aýdandyq ákimdikterinde memlekettik qyzmet «bir tereze» arqyly kórsetiledi

ALMATY. QazAqparat – Almatyda azamattar úshin memlekettik organdardy ashyq jáne qoljetimdi etý maqsatynda «Servıstik ákimdik» jobasy júzege asty. Bul týraly qala ákiminiń baspasóz hatshysy Áset Muqajanov málim etti, dep habarlaıdy QazAqparat tilshisi.

Áset Muqajanov Instagram paraqshasynda barlyq aýdandarda «Servıstik ákimdikter» ashylǵanyn jazdy.

«Open space formatynda azamattarǵa eń qajetti memlekettik qyzmetter kórsetilip, keńes beriledi. Ashyq kabınette azamattardy aýdan ákimderi men onyń orynbasarlary qabyldaıdy. Karantınge baılanysty kezdesýler onlaın formatta ótedi. Qala turǵyndaryn abattandyrý, TKSh, joldar men aýlalardy jóndeý, qoǵamdyq qaýipsizdik, jaryqtandyrý men sýmen jabdyqtaý máseleleri tolǵandyrady», - dep jazdy Almaty ákiminiń baspasóz hatshysy.

Almaty qalasynyń sybaılas jemqorlyqqa qarsy is-qımyl departamentimen birlesip júzege asyrylǵan jobanyń basty maqsaty – memlekettik organdardyń azamattarǵa ashyqtyǵy men qoljetimdiligin arttyrý, kedergisiz ortany qalyptastyrý.

«Memlekettik qyzmetterdi alý protsesi turǵyndar úshin barynsha jeńildetilgen ári yńǵaıly. Bul el Prezıdentiniń «Halyq únine qulaq asatyn memleket» qaǵıdatyna sáıkes keledi», - dep atap ótti Á. Muqajanov.