Almatynyń Arnaıy ekonomıkalyq aımaǵynda «Jasandy ıntellekt mektebi» ashylady

NUR-SULTAN. QazAqparat – Qyrkúıek aıynda Almatyda De Montfort Qazaqstan Brıtan ýnıversıtetiniń fılıaly ashylady, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide qala ákimi Baqytjan Saǵyntaev atalmysh jobanyń qunyn atady.

«Qyrkúıek aıynda De Montfort Qazaqstan Brıtan ýnıversıtetiniń fılıaly ashylady. 5 jylda ınvestıtsııa kólemi 50 mln AQSh dollaryn quraıdy. «Alataý» ınnovatsııalyq tehnologııalar parki» arnaıy ekonomıkalyq aımaǵynda 2 myń stýdentke arnalǵan Nazarbayev University bazasynda «Jasandy ıntellekt mektebi» jáne «Aqparattyq-kommýnıkatsııalyq tehnologııalar salasynda zertteýler júrgizýge arnalǵan zerthana» jobalaryn iske asyrýdy josparlap otyrmyz», - dedi qala ákimi.

Shahar basshysy aýstrııalyq VAMED kompanııasymen birlesip salý josparlanyp otyrǵan kópbeıindi aýrýhananyń boljamdy qunyn da atady.

«Koreıalyq áriptesterdi tarta otyryp, 300 oryndyq halyqaralyq klınıka salý josparda bar. Quny shamamen 38,7 mlrd teńge bolatyn joba 250 adamdy jumyspen qamtıdy. Sondaı-aq, aýstrııalyq VAMED kompanııasymen birlesip 90 mln dollarǵa 200 oryndyq kópbeıindi aýrýhana salý máselesi pysyqtalýda», - dedi ákim.