Almatynyń «Alǵabas» yqsham aýdanynyń turǵyndary kóshe joldaryna shaǵymdandy
Atalǵan máselege oraı Alataý aýdanynyń ákimi Azamat Qaldybekov jaýabyn jazdy. Onyń aıtýynsha, búginde barlyq kóshege ınertti materıaldar, ıaǵnı, asfalt úgindisi men qum- qıyrshyq tas qospasy sebilip jatyr.
«Turǵyndar úzdiksiz sýmen qamtýdy jáne káriz júıesin qajet etedi, al qurylys jumystarynyń qıyndyqtaryna tózgisi kelmeıdi. Jaz boıy «Alǵabasta» sý tek keshki ýaqytta berildi, sebebi, sýmen qamtýdyń menshik uńǵymalary arqyly sý berildi. Biz búginde ortalyq sýmen qamtýdy qosýdamyz, sondyqtan yqsham aýdannyń joldarynda jóndeý jumystary júrgizildi. Bul rette qazirgi jaǵdaıǵa shydaýǵa bolady dep sanaımyn. 18 kóshege asfalt tósedik, 20 kóshege qospa jaıyldy. Al barlyǵyna kúsh pen qarajat jetpeıdi, biraq, qospa tóseý jumysyn júrgizemiz. Bul Qarasaı aýdanynan qosylǵan jańa yqsham aýdan. Vıdeoda munda ómir boıy asfalt bolǵandaı kórsetesiz. Munda jóndeý jumystaryna deıin de eshteńe bolǵan joq, Qarasaı aýdanynda da osyndaı jaǵdaıda boldy. Injenerlik jelilerdi tóseý aıaqtalǵan soń, biz asfalttaý jumysyn tolyq aıaqtaımyz», - dedi aýdan ákimi.
Sondaı-aq, «Alǵabastaǵy» másele boıynsha Almaty qalalyq moblıdilik basqarmasy da málimdeme jasady.
«Atalǵan yqsham aýdandaǵy jol-qurylys jumystary «Alǵabas yqsham aýdanyndaǵy joldardyń qurylysy» jobasyn iske asyrý aıasynda júrgizilýde. Onyń ishinde uzyndyǵy 32 shaqyrym bolatyn 98 kóshe bar. Bul joba memlekettik saraptamadan ótken, Almaty qalalyq josparlaý jáne ýrbanıstıka basqarmasymen jáne qalanyń ózge de múddeli qyzmetterimen kelisildi. Almaty qalasy energotıimdilik jáne ınfraqurylymdyq damý basqarmasy qazirgi ýaqytta «Alǵabas» yqsham aýdanda ınjenerlik kommýnıkatsııalar tartý jumysyn júrgizýde. Jol-qurylys jumystary ınjenerlik kommýnıkatsııalardy ornatý jumystary aıaqtalǵan ýchaskelerde bastaldy. Joba boıynsha jumystar 2022 jyldyń jeltoqsan aıynda aıaqtalýy tıis. Búgingi kúni uzyndyǵy 6,8 shaqyrym bolatyn 21 kóshede qatty jabyn bar», - dedi basqarmada.