Almatynyń áleýmettik ınfraqurylymyn damytýǵa 1,3 trln teńgeden astam qarjy qajet

ALMATY. QazAqparat – Almatynyń Bas josparyn ázirleýshilerdiń boljamy boıynsha, 2030 jylǵa deıin qalanyń áleýmettik ınfraqurylymyn damytýǵa 1,3 trln teńge qajet, dep habarlaıdy QazAqparat tilshisi.

2030 jylǵa deıingi Bas jospar boıynsha jobalyq usynystardyń birinshi kezeńin iske asyrý úshin áleýmettik ınfraqurylymdy damytýǵa 1 trln 391 mlrd teńge ınvestıtsııa qajet.

Investıtsııalardyń basym bóligi (46,6%) mektep pen mektepke deıingi bilim berýdi damytý jáne densaýlyq saqtaý mekemelerin jetildirýge (27,3%) jumsalmaq.

Almaty qalasynyń Bas josparyn ázirleýshi Tamara Zalogınanyń aıtýynsha, megapolıste 300-den astam balabaqsha men 188 mektep salynady.

«Bas josparda almatylyqtardy jaqyn ornalasatyn áleýmettik ınfraqurylymmen qamtamasyz etý qarastyrylǵan. Atap aıtqanda, 335 balabaqsha, 188 mektep jáne qazirgi mektepterge 12 qosymsha qurylys, 65 emhana jáne 3 aýrýhana men 33 dene shynyqtyrý-saýyqtyrý keshenin salý josparda bar», - dedi ol.

Buǵan deıin Tamara Zalogına 2040 jylǵa qaraı Almaty halqynyń sany úsh mıllıon adamǵa jetetinin aıtqan bolatyn.