Almatynyń 8 shaǵyn aýdanynda 42,8 shaqyrym jańa jol salyndy

ALMATY. QazAqparat - Almaty ákimi Baqytjan Saǵyntaev «Almaty» telearnasyndaǵy onlaın- tanystyrylym barysynda megapolıstegi jol ınfraqurylymyn damytý, jańa joldardy jóndeý jáne salý jóninde málim etti, dep habarlaıdy QazAqparat tilshisi.

Onyń aıtýynsha, qalanyń aýmaǵy tarıhı jaǵynan Almaty oblysynyń irgeles aýdandarynyń esebinen ulǵaıdy. Qazirdiń ózinde, 2021 jyly qaladaǵy joldardyń jalpy uzyndyǵy 3097 shaqyrymǵa jetti. Almaty joldarynyń úlesi respýblıkanyń barlyq qala ishindegi joldarynyń besten bir bóligin (17,3%) quraıdy.

Kún saıyn qalada 700 myńnan astam kólik júrip, 1 mln-nan astam adam qatynaıdy. Magıstraldy kóshelerdiń uzyndyǵy 531 shaqyrym nemese 17%, aýdandyq mańyzy bar kósheler – 594 shaqyrym nemese 19%, jergilikti kósheler 1972.

Búginde jergilikti mańyzdaǵy 298,5 shaqyrym kóshe bar, negizinen qalaǵa qosylǵan shaǵyn aýdandarda ári olarǵa asfaltbeton tóselmegen. Jaqsy jáne qanaǵattanarlyq jaǵdaıdaǵy joldardyń úlesi 80% -dan (2477 km) asady.

2020 jyly uzyndyǵy 219 shaqyrym bolatyn 324 kóshege ortasha jóndeý júrgizildi. 86,6 shaqyrym trotýar jáne 40-tan astam aıaldamalar jóndelip, abattandyryldy.

Vision Zero tujyrymdamasyn iske asyrý maqsatynda Moldaǵalıev, Mámetova jáne Áıtıev kósheleriniń boıynda 14 trapetsııa tárizdi jasandy kedergiler men 102 qaýipsiz qurylǵylar jasaldy.

74 myń adam turatyn 8 shaǵyn aýdanda 42,8 shaqyrym jańa jol salyndy. Olar – Darhan-Baıbesik, Alǵabas-AZTM, Uljan-1, Uljan-2, Áıgerim-1, Áıgerim-2, Trýdovık, Shańyraq-2 shaǵyn aýdandary.