Almatynyń 2022 jylǵa arnalǵan bıýdjeti qandaı

ALMATY. QazAqparat- VII saılanym Almaty qalasy máslıhatynyń depýtattary 2022 jylǵa arnalǵan qala bıýdjetin qoldap, kezekti XIII sessııada bekitti. Jalpy somasy – 1,4 trln teńge, dep habarlaıdy QazAqparat tilshisi.

Kelesi jylǵa arnalǵan bıýdjet jobasyn depýtattarǵa Almaty qalasynyń ákimi Baqytjan Saǵyntaev tanystyrdy. Ótken jyldardaǵydaı, megapolıstiń basty qarjylyq qujaty áleýmettik baǵdarlanǵan bolyp qalyp otyr.
Osylaısha, bilim berý salasyna 197,3 mlrd teńge bólindi. Qarajat jalpy sany 310 myń oqýshysy bar 204 mektepti, 15 ınternat mekemelerin, 48 kolledjdi ustaýǵa arnalǵan. Budan basqa, kelesi jyldan bastap bilim berý obektileriniń buryn jekeshelendirilgen ǵımarattaryn kommýnaldyq menshikke qaıtarý josparlanýda. Osynyń arqasynda tek Áýezov jáne Bostandyq aýdandarynda oqýshy oryndyrynyń tapshylyǵyn qysqartý qarastyrylyp otyr.

Sondaı-aq, «Aınabulaq», «Saıaly-2», «Aqjar» yqsham aýdandarynda 640 oryndyq úsh balabaqshanyń qurylysyn bastaý, Alataý jáne Naýryzbaı aýdandarynda bes mektep pen balabaqshany seısmıkalyq nyǵaıtý, ınnovatsııalyq shyǵarmashylyqtyń eki ortalyǵyn salý josparlanýda.
Densaýlyq saqtaý salasynda 38,7 mlrd teńge kóleminde shyǵyndar josparlanyp otyr. Keńeıtilgen medıtsınalyq kómek kórsetý úshin «Mamyr-5», 6 yqsham aýdandarynda 200 kelýshige arnalǵan otbasylyq-dárigerlik ambýlatorııa salý josparlanýda.
Az qamtylǵan jáne kóp balaly otbasylarǵa kómek kórsetý úshin ataýly áleýmettik kómekti tóleý jáne azyq-túlik sebetteri men birinshi kezekte qajetti taýarlar berý josparlanǵan, oǵan 947,5 mln teńge bólinedi. Bekitilgen áleýmettik kómek tizbesine sáıkes 4 myń zeınetkerdi sanatorlyq-kýrorttyq emdeý boıynsha jeńildikterge 2,1 mlrd teńge, 9 mamyrǵa UOS qatysýshylaryna, az qamtylǵan azamattarǵa bir rettik materıaldyq kómek qarastyrylǵan. Múmkindigi shekteýli tulǵalarǵa 2 720 jeke kómekshiler men qımylmen kórsetý tili mamandarynyń qyzmetine 3,3 mlrd. teńge qarastyrylǵan.
Halyqty jumyspen qamtý baǵdarlamasyn qarjylandyrý aıasynda jastar praktıkasyna, qoǵamdyq jumysqa jáne erekshe qajettilikteri bar 500 adamnyń eńbek aqysyn sýbsıdııalaýǵa qarajat qarastyrý josparlanǵan. Jalpy atalmysh baǵdarlama aıasynda 8 myńnan astam adam qamtylatyn bolady.
Sonymen qatar, kólik salasynda barlyq baǵyttardaǵy avtobýs jolaýshylar tasymaldaryn, sondaı-aq temirjol qala mańy qatynastary men metropolıtendegi tasymaldardy sýbsıdııalaý jalǵastyrylady.
Turǵyn úı salasynda «Nurly jer» memlekettik baǵdarlamasy boıynsha ómirlik qıyn jaǵdaıda júrgen adamdar men otbasylarǵa áleýmettik kómek retinde 1 myń turǵyn úı sertıfıkaty qarastyrylǵan. Sonymen qatar, «Almaty jastary» baǵdarlamasy aıasynda jastarǵa «Otbasy bank» arqyly jeńildetilgen nesıe berý josparlanǵan.
Kommýnaldyq ınfraqurylymdy damytýǵa 64,5 mlrd teńge, onyń ishinde 50 myńǵa jýyq Qurylysshy, Ójet, Saıaly, Kemel, Jas Qanat, Qarǵaly, Shańyraq-2 jáne basqa shaǵyn aýdandardyń turǵyndaryn sýmen qamtamasyz etýge baǵyttaý josparlanýda. Medeý, Alataý, Naýryzbaı aýdandarynda ıesiz jelilerdi qaıta jańartý jumystaryn jalǵastyrý josparlanýda.
Jol-kólik ınfraqurylymyn damytýǵa 42,3 mlrd teńge bólindi. Onyń ishinde 200 shaqyrym jol jabynyn jóndeý josparlanǵan. Buqtyrma kóshesi – Qulja traktisi, Seıfýllın dańǵyly – Jansúgirov kóshesi, Saın kóshesi – Móńke Bı kóshesi qıylysyndaǵy kólik jolaıyryqtarynyń qurylysy jalǵastyrylady.
Sondaı-aq, sportty, týrıstik ınfraqurylymdy damytýǵa, aýmaqtardy kógaldandyrýǵa qarajat qarastyrylǵan.
2022 jylǵa arnalǵan bıýdjet jobasy qalanyń boljamdy damý parametrleri men áleýmettik-ekonomıkalyq damý boljamyn negizge ala otyryp qalyptastyryldy.
2021 jyldyń qorytyndysy boıynsha bıýdjetke túsetin túsimderdi kútiletin baǵalaýǵa sáıkes ósim 2020 jylǵa arnalǵan naqty túsimderdiń 115% deńgeıinde boljanyp otyr.