Almatynyń 100 oqýshysy Ulttyq ulannyń áskerı bólimine shaqyryldy

ALMATY. QazAqparat  - Búgin Almaty mektepteriniń 100 oqýshysy 7 mamyr - Otan qorǵaýshy kúni qarsańynda Qazaqstan Respýblıkasynyń Ulttyq ulany 5571-áskerı bóliminiń qyzmetimen tanysyp qaıtty, dep habarlaıdy QazAqparat tilshisi.  

Mektep oqýshylaryna Almaty qalasyndaǵy 8 aýdannyń tynyshtyǵy men tártibin qadaǵalaıtyn Ulttyq ulan sarbazdarynyń jumysy tanystyryldy.

Áskerı bólim komandıriniń tárbıe jáne áleýmettik quqyqtar jónindegi orynbasary Eljan Tursynbaev mundaı shara úsh aı saıyn ótkizilip turatynyn aıtty. 

«Búgin jas urpaqqa patrıottyq tárbıe berý máselesine óz úlesimizdi qosý maqsatynda Almaty mektepterinen 100 oqýshyny shaqyryp, áskerı bólimmen tanystyrdyq. Jastardyń áskerge degen oń kózqarasy qalyptassyn degen oımen 8-11 synyp oqýshylary shaqyryldy. Oqýshylarǵa tehnıka, qarý-jaraq túrlerin kórsetildi», - dedi Eljan Tursynbaev.

Onyń aıtýynsha, Ulttyq ulan ofıtserleri áskerı bólimge jaqyn ornalasqan mektepterge de baryp turady. 

«Ofıtserlerimiz jaqyn ornalasqan № 95, 25,16-mektepterde alǵashqy áskerı daıyndyq sabaqtaryn ótkizip turady. Ashyq esik kúnderi olardy osynda shaqyramyz», - deıdi ol.

Eljan Tursynbaev osy mamyr aıynda bólimshege kóktemgi shaqyrtý boıynsha jańa sarbazdar keletinin aıtty.

«Mamyr aıynda 2017 jyldyń 1-shi shaqyrylymy boıynsha jas sarbazdar keledi. Bizdiń áskerı bólim, qalanyń 8 aýdanyndaǵy tynyshtyqty qadaǵalaıdy. Sondyqtan, biz jas sarbazǵa kele salysymen qaýipsizdik sharalaryn úıretemiz. Birinshi, qalaı qorǵaný kerek, áskerı bólimdi qalaı qorǵaý kerektigi úıretilse, keıin qarý-jaraq qoldaný tásili, kóshe tynyshtyǵyn saqtaý jumystary túsindiriledi»,- dedi ol.

Jas sarbazdarǵa turaqty túrde ıdeologııalyq sabaqtar júrgizilip, onyń barasynda teologtar tarapynan da jat aǵymdar týraly dárister berilip turady.