Almatyny gazdandyrý qashan aıaqtalady
«Byltyr 2020 jyly qala tolyq gazdandyrylady dep aıtyp júrgen bolatynbyz. Qazir qalada túrli jańa úıler salynyp jatyr, kún sanap ǵımarat sany artyp keledi. Endi gazben qamtý 2021 jyly tolyq aıaqtalady. Injenerlik turǵyn úı qurylysyna rásimdelgen jerler kóp, alaıda olar áli salynyp jatyr», - dedi qalalyq Energotıimdilik pen ınfraqurylymdyq damý basqarmasynyń basshysy Áset Masabaev.
Onyń aıtýynsha, qurylys jumystary Jetisý, Alataý, Medeý, Túrksib, Naýryzbaı aýdandarynda qyzyp jatyr.
Osy aýdandardaǵy kóptegen úıler kezinde Almaty oblysyna qarasty bolǵan.
«Qazir «QazTransGaz Aımaq» JShS jańa jobalardy júzege asyryp jatyr. Eki jylda barlyq úılerge ortalyq gazben qamtý júıesi tartylady», - dedi ol.
Sonymen qatar, almatylyqtarǵa bıyldan bastap gaz kirgizýge paıyzsyz nesıe beriledi. Qujattar 10 tamyzdan bastap qabyldanady.