Almatylyqtarǵa óz kásibin ashý úshin memleketten 1,3 mln teńge grant beriledi

ALMATY. QazAqparat - Almatyda jumyssyzdarǵa jeke kásibin ashýǵa bıyl 517,5 mln teńgege 375 grant berý jospary bekitildi. Bul týraly Óńirlik kommýnıkatsııalar qyzmeti alańynda qalalyq jumyspen qamtý ortalyǵynyń dırektory Saǵyndyq Kenjebaev málim etti, dep habarlaıdy QazAqparat tilshisi.

Spıkerdin sózinshe, bıznes-ıdeıalardy iske asyrýǵa arnalǵan granttar áleýmettik osal toptardyń azamattary úshin bólinetin bolady. Búgingi tańda komıssııa 1059 ótinimdi qarady, onyń 94–i maquldandy, 965 ótinish qabyldanbady.

«400 eselengen aılyq eseptik kórsetkish (1 380 000 teńge) mólsherindegi memlekettik grant - jańa bıznesti bastaý jáne damytý úshin qaıtarymsyz negizde beriletin bastapqy kapıtal», — dedi Saǵyndyq Kenjebaev.

Aıtýynsha, granttar kelesi baǵyttarda qoldaný úshin beriledi: eńbek quraldaryn, tehnologııalyq jabdyqty, janýarlardy, maldardy, qustardy, kóshetterdi, butalardy, tuqymdardy, kóshetterdi satyp alý, úı-jaılardy jalǵa alý aqysyn tóleý. Granttar tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aktsızdeletin ónimder óndirýge berilmeıdi.

Granttar alýdyń negizgi sharttary:

1. Jumyspen qamtýdyń mynadaı sanattarynyń birine jatý:

- Tirkelgen jumyssyzdar

- Jeke kásipkerler (3 jylǵa deıin)

2. Kelesi áleýmettik sanattardyń birine jatý:

- Kópbalaly tulǵalar-kópbalaly járdemaqy alýshylar (jubaıy, zaıyby)

- Qonys aýdarýshylar jáne olardyń eńbekke qabiletti otbasy músheleri

- Múmkindigi shekteýli balany tárbıeleýshi járdemaqy alatyn adamdar (jubaıy, zaıyby)

- Ataýly áleýmettik kómek alýshy az qamtylǵan adamdar jáne olardyń otbasy músheleri

- Asyraýshysynan aırylý jaǵdaıy boıynsha áleýmettik járdemaqy alýshylar

- Kandas mártebesi bar adamdar

- Múmkindigi shekteýli adamdar

3. «Bastaý Bıznes» jobasy boıynsha kásipkerlik negizderine oqytý týraly sertıfıkatynyń bolýy. (Oqýdy onlaın túrde skills.enbek.kz portaly arqyly ótýge bolady)

«Grant alýǵa kandıdattardyń ótinishi men bıznes-jobasyn halyqty jumyspen qamtý ortalyǵy, «Atameken» óńirlik kásipkerler palatasy, jergilikti atqarýshy organdar, qoǵamdyq birlestikter, ǵylymı-bilim berý mekemeleri ókilderiniń, bıznes, óńirlik buqaralyq aqparat quraldary ókilderiniń, salalyq sarapshylardyń qatysýymen qurylǵan komıssııanyń otyrysyna qaraýǵa shyǵarady. Halyqty jumyspen qamtý ortalyǵy onyń quramyna kirmeıdi jáne sheshim qabyldaý kezinde daýys bermeıdi», - dep tolyqtyrdy spıker.

Sondaı-aq, grant alǵan sátten bastap basty shart jeke kásipker retinde úsh aı ishinde tirkelýi tıis.

Grantqa ótinish berý úshin business.enbek.kz. portalyna tirkelý qajet. Barlyq suraqtar boıynsha halyqty jumyspen qamtý ortalyǵyna, Dostyq dańǵyly 85, «áleýmettik qyzmetter úıi» mekenjaıy boıynsha nemese 310-47-82 biryńǵaı nómiri boıynsha habarlasýǵa bolady.