Almatylyqtarǵa MÁMS aıasynda 78 mlrd teńgege medıtsınalyq kómek kórsetildi

ALMATY. QazAqparat - Almatyda bıylǵy 7 aıda MÁMS aıasynda kórsetilgen qyzmetter úshin 78 mlrd teńgege jýyq qarjy tólendi. Bul týraly ÓKQ brıfınginde «Áleýmettik medıtsınalyq saqtandyrý qory» KEAQ Almaty qalalyq fılıaly dırektory Tileýhan Ábildaev aıtty, dep habarlaıdyQazAqparattilshisi.

Spıkerdiń aıtýynsha, qańtar-shilde aralyǵynda tólengen 40,6 mlrd teńge statsıonarlyq deńgeıdegi medıtsınalyq kómekke, taǵy 3,2 mlrd teńge kúndizgi statsıonar qyzmetine jumsalǵan.

«7 aıdyń nátıjesine qarap halyqqa kórsetilip jatqan medıtsınalyq kómek kóleminiń edáýir artqanyn baıqaýǵa bolady. Máselen, buǵan deıin kópshiliktiń qaltasy kótere bermeıtin qymbat analızder, dıagnostıka men operatsııa túrleri qazir medıtsınalyq saqtandyrý esebinen kórsetilip jatyr», – dedi Tileýhan Ábildaev.

Tólengen qarjynyń 15,9 mlrd teńgesi konsýltatıvtik-dıagnostıkalyq qyzmetterge tıesili. Konsýltatıvtik-dıagnostıkalyq qyzmetter ishinde ásirese, KT men MRT-ǵa degen suranys joǵary.

Sondaı-aq, 7 aıda Almatyda 996,8 mln teńgege 62 myńnan astam kompıýterlik tomografııa, 744,2 mln teńgege 50 myńnan astam magnıttik-rezonanstyq tomografııa jasalǵan. Qala boıynsha onkologııalyq isikti anyqtaý maqsatynda jasalatyn 2793 PET-dıagnostıka qyzmeti kórsetilgen. Oǵan 750,1 mln teńge tólendi.

«Sońǵy jyldary ekstrakorporaldy uryqtandyrý qyzmetiniń de jurtshylyq úshin mańyzy joǵary bolyp otyr. Qymbat qyzmet túrine jatatyn EKO protsedýrasy 2020 jyldan bastap MÁMS paketine enip, qarapaıym jurtshylyq úshin qoljetimdi bola bastady. 2022 jyly EKO baǵdarlamalaryna 3,2 mlrd teńgeden astam qarjy qarastyrylǵan. Buǵan barlyǵy 3152 EKO jasalýy tıis. Ótken 7 aıda Almatyda 1639 EKO jasalyp, oǵan 1,7 mlrd teńge tólendi. Bıyl Almaty qalasy boıynsha atalǵan baǵdarlamaǵa 8 klınıka qatysyp jatyr», - dedi fılıal basshysy.

Aıtýynsha, qazirgi tańda saqtandyrylǵan azamattar baǵasy qymbat qyzmet túrlerin kóp paıdalanýda. Sonyń biri – medıtsınalyq reabılıtatsııa. 2022 jyly kórsetilgen reabılıtatsııa qyzmetine 4,7 mlrd jumsaldy. Salystyrmaly túrde 2019 jyly ońaltý qyzmetine bar-joǵy 0,6 mlrd teńge jumsalǵan, al 2022 jyly oǵan 7,5 mlrd teńge qarastyrylyp otyr.

«Oǵan qosa, 2020 jyldan bastap halyqtyń jekelegen sanattary úshin josparly stomatologııalyq kómek te qoljetimdi bola bastady. Mysaly, 7 aıda MÁMS sheńberinde 717 myńnan astam stomatologııalyq qyzmet kórsetilgen, oǵan 1,8 mlrd teńge tólendi. Qazirgi tańda Almatyda MÁMS sheńberindegi stomatologııalyq kómekti 46 klınıka kórsetedi», - dedi Tileýhan Ábildaev.

Eske salsaq, mindetti áleýmettik medıtsınalyq saqtandyrý arqyly júkti áıelder men 18 jasqa deıingi balalarǵa stomatologııalyq kómek tegin kórsetiledi. Al shuǵyl stomatologııalyq kómek - kepildendirilgen tegin medıtsınalyq kómek paketi sheńberinde halyqtyń áleýmettik jaǵynan az qorǵalǵan sanattaryna ǵana kórsetiledi.