Almatylyqtarǵa Irannyń satylmaıtyn qundy jádigerleri kórsetildi
Búgin Almatydaǵy Qazaqstan memlekettik ortalyq mýzeıinde Iran Islam respýblıkasynyń Mádenı ókildigi Naýryz meıramyna arnalǵan «Shahname» qolóner buıymdaryny men kórkem týyndylar kórmesin ashty.
Kórme eki elge de ortaq áz-Naýryz merekesiniń qurmetine oraı uıymdastyrylyp otyr.
Ortalyq mýzeı dırektorynyń ǵylymı jumystar jónindegi orynbasary Ǵalııa Temirtonnyń aıtýynsha, Iran mádenıetine qatysty kórme osymen 5-shi ret uıymdastyrylyp otyr.
«QR Memlekettik ortalyq mýzeıi Iran Islam respýblıkasynyń Almaty qalasyndaǵy Bas konsýldyǵy janyndaǵy Mádenı ókildigimen belsendi túrde qarym-qatynas ornatyp keledi. Omar Haıam, Saǵdı, Hafız syndy shaıyrlardyń jyrlary parsy tilinde. Búgingi kórmede Fırdaýsıdiń «Shahname» dastanynyń jelisi boıynsha kórkem bezendirilgen sýretter qoıylǵan», - dedi Ǵalııa Temirton.
Iran mádenı ókildiginiń jetekshisi Seıid Javad Jálelıdiń aıtýynsha, búgingi kórmede 50-den astam qundy jádigerler usynylǵan.
«Kórmege «Shahnama» dastanynan alynǵan úzindiler qoıyldy. Shahname dastanynda batyrlyq qasıet jyrlanǵandyqtan qazaq ádebıetiniń lıro-epostyq jyrlaryna da áser etken. Ony birinshi Turmaǵambet Іztileýov qazaqsha jyrlap shyqqan. Jádigerler óte qundy bolǵandyqtan satylmaıdy. Onyń quny óte joǵary. Bul jerde Irannyń barlyq óńirinen shyqqan qolónershilerdiń týyndylary toptastyrylǵan. Jádigerler aǵashtan, temirden, mystan oıylyp jasalǵan. Byltyr Taldyqorǵan qalasynda ótkizdik, kelesi jyly Shymkentte ótkizý josparda bar», - dedi ol.
Kórmede Irannyń «hatam», «mınıkarı» syndy dástúrli óner úlgileri boıynsha ázirlengen buıymdardy tamashalaýǵa bolady.