Almatylyqtarǵa Bogdanovıch shyńyna kóterilý qaýipti ekeni eskertildi

ALMATY. QazAqparat – Almaty qalalyq Týrızm basqarmasy qar kóshkini qaýpine baılanysty Bogdanovıch shyńyna kóterilýge eskertý jarııalady. Búgin onlaın brıfıng barysynda qalalyq Týrızm basqarmasynyń basshysynyń orynbasary Marat Aınabekov taý týrızmi týraly aıtty, dep habarlaıdy QazAqparat tilshisi.

Bogdanovıch muzdyǵy Іle Alataýynyń Kishi Almaty sileminde ornalasqan. Muzdyq teńiz deńgeıinen 3160-3360 metr bıikte ornalasqan.

«Sońǵy ýaqytta áleýmettik jelide Bogdanovıch muzdyǵyna barýshylar sany artyp bara jatqanyn baıqaımyz. Alpınızm men sport týrızmi federatsııasynyń sarapshylarymen aqyldasa otyryp mynadaı qorytyndyǵa keldik. Qala turǵyndary men qonaqtary úshin taýǵa shyǵýdyń qaýpi arta tústi. Sebebi, qazir maýsymaralyq ýaqytta joldar taıǵanaq ári taýdaǵy aýa temperatýrasy qubylmaly. Qar kóshkini men sel júrý qaýpi bar», - dedi basqarma basshysynyń orynbasary Marat Aınabekov.

Onyń aıtýynsha, jaqyn arada kún sýytyp, jaýyn jaýýy múmkin.

«Taýǵa shyǵar kezde mindetti túrde jaýyn-shashyn bar-joǵyn tekserip shyǵý kerek», - dediol.

Basqarma ókili 2021 jyly 120 shaqyrym taý soqpaǵyn abattandyrý qarastyrylǵanyn aıtty.

Týrısterdiń qaýipsizdigi maqsatynda Úlken jáne Kishi Almaty shatqaldarynda 2 qutqarý pýnkti, 14 qaýipsizdik tiregi, Tuıyq sýda tikushaq alańy jasalady.

Taý shatqalynda týrıstik navıgatsııa biryńǵaı júıesi, «Tau Go» smart navıgator jasalady.

Odan bólek 2021 jyly taý aımaǵynda baqylaý qutqarý pýnkti ashylyp, ol jerde qutqarýshylar táýlik boıy kezekshilik júrgizetin bolady. Taý qutqarýshylarynyń qatarynan qosymsha 16 shtat ashylatyn bolady.