Almatylyqtarǵa 65 mln teńge shyǵyn keltirgen kúdikti ustaldy
Qalalyq polıtsııa departamentiniń baspasóz qyzmeti málim etkendeı, turǵyndardan alaıaqtyq jolmen iri kólemde aqsha aldy degen kúdikpen 55 jastaǵy túrkistandyq er adam ustaldy.
Belgili bolǵanyndaı O.esimdi azamat 5 jábirlenýshige 65 mln teńge kóleminde shyǵyn keltirgen. Ol QR Qylmystyq is júrgizý kodeksiniń 128-babyna sáıkes ýaqytsha ustaý ızolıatoryna qamaldy.
«Tergeý barysynda er adamnyń beıtanys adamdardyń senimine kirip, Almaty qalasynyń kez kelgen aýdanynda jer telimderin, jyljymaıtyn múlikti tirkeýge, zańdastyrýǵa jáne jer telimine memlekettik aktilerdi alyp beremin dep usynys jasaǵany anyqtaldy. Kúdikti bastapqy tólemdi alyp, sodan keıin klıenttiń aqshasymen joǵalyp ketti. Qazirgi ýaqytta bizdiń bólimshege bes adam aryzben júgindi», – deıdi Almaly aýdandyq polıtsııa basqarmasynyń bastyǵy Oljas Sháripov.
Polıtsııa qyzmetkerleri kúdiktiniń qalanyń basqa aýdandarynda da osyǵan uqsas qylmystarǵa qatysy bolýy múmkin ekenin joqqa shyǵarmaıdy.
Osyǵan baılanysty polıtsııa ókili azamattardy kúdiktini tanyǵan jaǵdaıda myna telefon nómirlerine habarlasýǵa shaqyrady: 8-705-555-77-63 jáne 8-778-591-91-35.
QR QK-niń 201-babyna sáıkes ózge aqparat tergeý múddesine oraı jarııa etilmeıdi.