Almatylyqtardyń medsaqtandyrý jarnasy 60 mlrd teńgeden asty

ALMATY. QazAqparat – Almatylyqtardyń saqtandyrý jarnasy 60 mlrd teńgeden asty. Bul týraly Almaty qalasy «Áleýmettik medıtsınalyq saqtandyrý qory» KEAQ fılıalynyń dırektory Nurlybek Qabdyǵaparov aıtty, dep habarlaıdy QazAqparat tilshisi.

«Almaty qalasy el boıynsha jarna men aýdarym kólemi jaǵynan kósh bastap tur – jınaqtalǵan somanyń besten bir bóligi burynǵysha ońtústik astanalyqtarǵa tıesili. Jalpy, saqtandyrý júıesi iske qosylǵan 2017 jyldyń 1 shildesinen 2020 jyldyń 31 naýryzyna deıingi aralyqta Almaty qalasynan qorǵa 60 mlrd teńgeden astam jarna aýdaryldy. Onyń 54,7 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymy», - dedi fılıal dırektory Nurlybek Qabdyqaparov

Sondaı-aq, jyl basynan beri ózin-ózi jumyspen qamtyǵan 10 myńǵa jýyq adam 40,1 mln teńge kóleminde biryńǵaı jıyntyq tólem tólegen.

«Birińǵaı jıyntyq tólem – respýblıkalyq mańyzy bar qalalar úshin 1 aılyq eseptik kórsetkish (AEK) nemese 2651 teńge, aýyldyq jerler úshin – 0,5 AEK nemese 1326 teńge kóleminde belgilengen. Tólemniń bul túrin frılanserler, santehnıkter, qurylysshylar, taksı júrgizýshileri t.b. tóleı alady»,– deıdi Nurlybek Qabdyqaparov,

Esterińizge sala ketsek, biryńǵaı jıyntyq tólem 2019 jyldyń 1 qańtarynan bastap engizilgen bolatyn. Jıyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 paıyzyn quraıdy.