Almatylyqtardyń kólik salyǵy boıynsha bereshegi 4,8 mlrd teńgege jetti

ALMATY. QazAqparat – Almaty qalasy boıynsha memlekettik kirister departamenti quzyrly organdarmen kólik salyǵyn tólemeı júrgen azamattarǵa reıd uıymdastyrdy. Shara barysynda 112 avtokólik aıyp turaǵyna qoıyldy, dep habarlaıdy QazAqparat tilshisi.

Departament málimetinshe, mamandar boryshkerler kóligin «Sergek» beınekamerasy arqyly izdep, tabady. Júrgizýshiniń jeke basy anyqtalǵannan keıin, avtokólik ıesi qaryzdy tolyq ótegenshe ol aıyppul turaǵyna ornalastyrylady. 10 kún jumys barysynda 112 kólik aıyppul avtoturaǵyna alyndy. Nátıjesinde bıýdjetke 200 mıllıon teńgeden astam kiris tústi. «Búginde qalanyń kólik salyǵy boıynsha qaryzy – 4,8 mlrd teńge. Bul somanyń negizgi bóligi qozǵaltqysh kólemi úlken – 4 myń tekshe sm-den astam avtokólik ıelerine tıesili. Sot oryndaýshylarynyń qyzmetterine aqy tóleý jáne avtoturaq shyǵyny bolmaýy úshin Almaty qalasy Memlekettik kirister departamenti kólik ıelerin salyq qaryzyn óteýge shaqyrady»,- delingen habarlamada.