Almatylyqtardyń 85%-y vaktsına almaǵandyqtan KVI juqtyrǵan

ALMATY. QazAqparat – Almaty qalasy KVI boıynsha «sary» aımaqta bolǵanmen, qalada karantındik sharalar qatańdatylǵan joq. Sebebi, turǵyndardyń 90%-da indet jeńil túrde ótip jatyr. Bul týraly Premer-mınıstrdyń orynbasary Eraly Toǵjanov aıtty, dep habarlaıdy QazAqparat tilshisi.

«Biz ázirge qatań shekteýlerge baryp jatqan joqpyz. Sebebi, halyqtyń 90%-da aýrý jeńil túrde ótip jatyr. Osynyń bárin eskerip otyrmyz. Degenmen, «saqtyqta qorlyq joq» degendeı, áli de saqtaný kerek. Іndetke jeńil qaraýǵa bolmaıdy. Ár adam ózine, aınalasyna jaýapkershilikpen qaraý kerek», - dedi vıtse-premer.

Onyń aıtýynsha, Almatyda KVI-ge qarsy naqty sharalar qabyldanyp jatyr.

«Shaharda qaıtadan vaktsınalaý, revaktsınalaý bastalady. Aıta keteıin, búginde almatylyqtardyń 85%-nyń KVI-men aýrýynyń sebebi, ekken vaktsınasynyń ýaqyty ótip ketýi nemese múlde vaktsına almaǵannan bolyp otyr. Sondyqtan, qaıtalap aıtam, vatsınany qabyldaý kerek, maskalyq rejımdi, jeke gıgıenany saqtaý kerek», - dedi ol.

Sondaı-aq, Eraly Toǵjanov Almatynyń indetke qarsy daıyndyq sharalaryn oń baǵalady.

«Qazirgi tańda qalada mobıldik toptardyń tek 70-i istep tur. Qajet jaǵdaıda, olardy 150-ge deıin kóbeıtýge bolady. Qalada epıdahýal baqylaýda ustalyp otyr. Almaty qalasynan kóp azamattar men jolaýshylar basqa aımaqtarǵa shyǵyp jatady. Sondyqtan, búginde «jasyl» aımaqta turǵan ózge óńirler indetke qarsy saqtyq sharalaryna kóńil bólgeni durys», - dep atap ótti vıtse-premer.

Aıta ketsek, Qazaqstanda taǵy 334 adam koronavırýs juqtyryp aldy.