Almatylyqtardyń 80 paıyzy mindetti medıtsınalyq júıemen saqtandyrylǵan

ALMATY. QazAqparat – Almaty qalasy «Áleýmettik medıtsınalyq saqtandyrý qory» KEAQ fılıalynyń dırektory Tileýhan Ábildaev onlaın brıfıng barysynda megapolıstegi MÁMS-ti iske asyrýdyń birinshi jylynyń nátıjesi týraly aıtty, dep habarlaıdy QazAqparat tilshisi.

Onyń aıtýynsha, saqtandyrý júıesindegi ózekti máselelerdiń biri – jurtshylyqty saqtandyrý mártebesimen qamtamasyz etý. Ulttyq ekonomıka mınıstrliginiń málimetinshe, bıylǵy birinshi jeltoqsanda Almatyda 1,9 mln turǵynnyń 1 605 342-si nemese 82,1% saqtandyrylǵan. 421 121 adam saqtandyrylmaǵan.

«Qala ákimi azamattardyń statýsyn ózektendirý boıynsha birqatar tapsyrma bergen. Nátıjesinde 1 tamyzda Almatyda saqtandyrylmaǵandardyń sany 459 myń bolsa, jeltoqsan aıynda 22,6%-dan 17,9%-ǵa deıin qysqarǵan. Saqtandyrylmaǵandardy qurylymyna qaraı bóletin bolsaq: 146 myńnan astamy – biryńǵaı jınaq (BJT) tóleýshiler. Olar tótenshe jaǵdaı kezinde bir rettik járdemaqy alý úshin BJT tólep, keıin toqtatyp tastaǵan bolýy múmkin. Taǵy 148 myń adamnyń áleýmettik statýsy belgisiz, ıaǵnı ótken 11 aıda olardyń atyna birde-bir ret tólem túspegen», - deıdi T. Ábildaev.

Sonymen qatar, ol saqtandyrylmaǵandardyń 100 myńy jumyskerler ekenin atap ótti. Keıingi aılardy ártúrli sebeptermen olardyń atyna saqtandyrý tólemderin aýdarý toqtatylǵan. Bul sanattyń ishinde jyl sońyna deıin salyqtan bosatylǵan shaǵyn jáne orta bıznes nysandarynyń qyzmetkerleri de bolýy múmkin. 16 140 – jeke kásipker.