Almatylyqtar Jeńistiń 78 jyldyǵyn toılap jatyr
Mereke dástúr boıynsha 28 gvardııashyl-panfılovshylar atyndaǵy saıabaqta Máńgilik alaýǵa gúl shoqtaryn qoıýdan bastaldy.
Soǵys ardagerleri, tyl eńbekkerleri, áskerı qyzmetshiler, quqyq qorǵaý organdarynyń ókilderi, qoǵam qaıratkerleri men qala turǵyndary soǵys maıdanynan oralmaǵan jaýyngerlerdi bir mınýt únsizdikpen eske aldy.
Sondaı-aq osy saıabaqta qazaqstandyq zamanaýı áskerı tehnıka men qarý-jaraqtyń kórmesi uıymdastyryldy. Budan bólek, Ekinshi dúnıejúzilik soǵys ardagerleri men tyl eńbekkerlerine áskerı-dalalyq as mázirimen merekelik túski as berilip, kontsert ótti. Qazaqstandyq ártister maıdan dalasyndaǵy ánderi oryndady.
Buǵan qosa, Almatyda B.Momyshuly monýmentine, T.Bıgeldınov, R.Qoshqarbaev memorıaldyq taqtasyna, Á.Moldaǵulova men M.Mámetova, S.Nurmaǵambetov eskertkishterine, S.Lýganskııdiń bıýstine, «Otan uldaryna máńgilik estelik» jáne «Otan úshin shaıqasta qaza tapqandarǵa máńgilik dańq» memorıaldaryna gúl shoqtary qoıyldy.
Jeńis kúnin merekeleý Sh. Ýálıhanov atyndaǵy skverde jáne Jibek Joly-Panfılov kósheleriniń qıylysynda da ótti. Kontsertte «Almaty áýenderi» ártisteri, Abaı atyndaǵy QUOBT solısteri jáne basqa da mýzykalyq ujymdar óner kórsetti.
Aıta keteıik, Almatyda merekelik is-sharalar qalanyń basqa aýdandarynda da ótip jatyr.
Soǵys jyldary maıdanǵa 1,3 mln qazaqstandyq shaqyryldy. Qazaqstannyń 100 myńnan astam sarbazy jaýyngerlik ordendermen jáne medaldarmen marapattaldy, 500-den astam adam Keńes Odaǵynyń Batyry atandy. Qazir Almatyda 56 ardager turady.