Almatylyqtar jándikter men kemirgishterdi joıý úshin qaıda shaǵymdana alady
Almaty qalasynyń sanıtarııalyq-epıdemıologııalyq baqylaý departamenti sońǵy ýaqytta kemirgishter (egeýquıryq, tyshqan) men jándikterdiń (taraqan, qandala, masa) kóbeıýine baılanysty qala turǵyndarynan jıi shaǵymdar túsýine baılanysty «Halyq densaýlyǵy jáne densaýlyq saqtaý júıesi týraly» QR Kodeksine sáıkes, qazirgi ýaqytta profılaktıkalyq deratızatsııany uıymdastyrý jáne júrgizý boıynsha barlyq is-sharalardy Almaty qalasynyń Kommýnaldyq ınfraqurylymdy damytý basqarmasy júzege asyratynyn habarlady.
«Qala aýmaǵynda jáne jeke menshik úı ıelikterinde profılaktıkalyq deratızatsııa jylyna eki ret, ıaǵnı kóktemgi jáne kúzgi kezeńderde júrgizilýi tıis. Kemirgishtermen baılanysty barlyq máseleler boıynsha atalǵan basqarmaǵa nemese turǵylyqty jeri boıynsha aýdandyq ákimdikke júginý qajet.
Páterlerde paıda bolǵan jándikter men kemirgishterge qarsy óńdeý jumystaryn júrgizý máselesi boıynsha QR «Halyq densaýlyǵy jáne densaýlyq saqtaý júıesi týraly» Kodeksiniń 107-babynyń 1-tarmaǵyna sáıkes, jeke jáne zańdy tulǵalar ózderi turatyn jerlerde dezınsektsııalyq jáne deratızatsııalyq jumystardy júrgizýge mindetti. Ol úshin zııankestermen kúres jumystaryn júrgizetin qalanyń mamandandyrylǵan dezınfektsııalyq uıymdaryna júginý qajet», - dep habarlady vedomstvodan.
Sondaı-aq, qalalyq SEBD kóp qabatty úılerdiń turǵyndaryna habarlama jasady.
«Toqsanyna 1 ret josparly túrde ótkiziletin kemirgishterdi joıý jónindegi jumystardy turǵyn úılerdiń podezderinde, jertólelerinde, shatyrlarynda, qoqys jáshikterinde jáne olardyń aınalasynda, sondaı-aq dezınfektsııalaý uıymdaryn jaldaý jolymen káriz qudyqtarynda páter ıeleri kooperatıvteri (PIK) júrgizýi tıis. Bul jumystarǵa jumsalatyn shyǵyndar «Kondomınıým obektisiniń ortaq múlkin kútip-ustaý erejesi» QR Úkimetiniń 2011 jylǵy 1 jeltoqsandaǵy №1421 qaýlysyna sáıkes kommýnaldyq qyzmetterdi tóleýge engizildi.
Osy oraıda, kóp qabatty úılerdiń turǵyndary PIK basqarmasynan osy jumystyń ýaqytyly jáne tıimdi oryndalýyn talap etýge tolyq quqyly. PIK tóraǵasy óz mindetterin oryndamaǵan jaǵdaıda, turǵyndardyń jalpy jınalysynda tóraǵany qaıta saılaýǵa nemese máseleni sot tártibimen sheshýge tolyqqandy quqyqtary bar», - dep málim etti SEBD-dan.
Ashy q k ó zderden alyn ǵ an foto