Almatylyqtar «Táýelsizdik tańy» monýmentine gúl shoqtaryn qoıdy

ALMATY. QazAqparat – Almatylyqtar 1986 jylǵy jeltoqsan oqıǵasynyń qurbandaryn eske alyp, «Táýelsizdik tańy» monýmentine gúl shoqtaryn qoıdy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.

Almaty qalasy ákimdiginen habarlaǵandaı, saltanatty sharaǵa qala ákiminiń orynbasary Arman Qyryqbaev, jeltoqsan oqıǵasyna qatysýshylar, qoǵamdyq uıymdardyń ókilderi qatysty. Іs-sharaǵa qatysýshylar táýelsizdik jolynda qurban bolǵan jastardy bir mınýt únsizdikpen eske aldy. Din ókilderi quran baǵyshtady.

Aıta keteıik, «Táýelsizdik tańy» monýmenti 2006 jyly Jeltoqsan oqıǵasynyń 20 jyldyǵyna oraı ashylǵan. Monýment Almaty qalasyndaǵy Jeltoqsan men Sátbaev kósheleriniń qıylysynda ornalasqan. Eskertkish táýelsizdik, ult bolashaǵy, urpaq taǵdyry úshin janyn qıǵan qazaq jastaryna arnalǵan.

Eske salaıyq, 16 jeltoqsan - Táýelsizdik kúni Almaty ákimi Erbolat Dosaev bastaǵan qala jurtshylyǵy Táýelsizdik monýmentine gúl shoqtaryn qoıdy.

Búgin Prezıdent Qasym-Jomart Toqaev Twitter-degi paraqshasynda 16 jeltoqsan oqıǵasyna qatysty jazba jarııalady. Onda: «Tól tarıhymyzda óshpes iz qaldyrǵan Jeltoqsan oqıǵasyna búgin 36 jyl toldy. Sol yzǵarly kúnderde halqymyz qaısar rýhy men azattyqqa degen umtylysyn pash etken edi. Jeltoqsan qaharmandarynyń erligi men qurban bolǵan bozdaqtardyń beınesi jurtymyzdyń jadynda máńgi saqtalady»,-dep jazdy Prezıdent.