Almatylyqtar Naýryz merekesin atap ótip jatyr

ALMATY. QazAqparat - Almatyda negizgi mereke Astana alańynda ótti, dep habarlaıdy QazAqparat.

Merekeni qala ákimi Baýyrjan Baıbek ashty. Ol óz sózinde Elbasy - Nursultan Nazarbaevtyń tarıhı sheshimi men eldiń damýyna qosqan úlesi týraly aıtty.

Kópshilikti quttyqtaýdan soń ákim Naýryzdy keńinen toılap, kóktemniń shýaqty kúninen keremet lázzat alýǵa bolatynyn aıtty.

Búgin qalanyń Astana alańyna jınalǵan qaýym qazaqtyń kóne dástúrleriniń biri - Aq shashýdy kórdi.

Qart ájeıler jınalǵandarǵa batasyn berip, táttiden shashý shashty.

Búgin bul alańda qas qaraıǵansha merekelik kontsert bolmaq. Sheteldik jáne otandyq ónerpazdar kórermenniń kóńilin kóterdi.

Alańǵa serýenge shyqqan halyq ulttyq kıimderdiń kórmesin tamashalap, búrkitshiler men batyrlarmen, ertegi keıipkerlerimen sýretke tústi.

Jastar jaǵy ulttyq sport túrlerinen jarysqa túsip, qoshqar kóterip qara kúshin synady.

Sonymen qatar, «Nomad» jylqy sporty ansambli men kaskaderler at qulaǵynda oınap, kóne sport túrlerin jańǵyrtty.

Aıta ketý kerek, qalada mereke keshe bastalǵan bolatyn. Keshe qala kóshelerimen ertegi keıipkerleri men batyrlar júrip ótti.

Al búgin ár aýdannyń halqy Ulystyń uly kúnin óz aýdandarynda toılap jatyr. Atap aıtqanda, Alataý aýdanynda Alataý aýdanynyń turǵyndary jınalyp, altybaqan tepti.