Almatylyqtar medıtsınalyq qorǵa 16 mlrd teńge aýdarǵan

ALMATY. QazAqparat – Áleýmettik medıtsınalyq saqtandyrý qoryna 91,5 mlrd teńgege jýyq qarjy jınaqtaldy. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly málimdedi, dep habarlaıdy QazAqparat tilshisi.

«Almaty qalasy respýblıka boıynsha jarnalar men aýdarymdardyń kólemi jaǵynan kósh bastap tur. Jınaqtalǵan somanyń besten bir bóligi Almatyǵa túsip jatyr. Jalpy, saqtandyrý júıesi iske qosylǵan 2020 jyldyń 1 qańtarynan 29-shy mamyryna deıingi aralyqta Almaty qalasynan Qorǵa 16 mlrd teńgeden astam jarna aýdaryldy. Onyń 10,9 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymdary, qalǵan 5,2 mlrd teńge – jeke kásipkerler men azamattyq-quqyqtyq kelisim shart boıynsha eńbek etetinderge tıesili», - dedi fılıal dırektory Tileýhan Ábildaev

Sondaı-aq, biryńǵaı jıyntyq tólem tóleýshiler sanynyń da artqany baıqalady. Sáýir aıynda BJT tólegen azamattar sany 1,8 mln bolsa, mamyr aıynda bul kórsetkish 2,2 mln adamǵa jetti. Al, Almaty qalasy boıynsha 2019 jyldyń basynan beri ózin-ózi jumyspen qamtyǵan 170 myńǵa jýyq adam 230 mln teńge kóleminde BJT tólegen.