Almatylyqtar «Qyzǵaldaq syıla» chellendjin jalǵastyryp, gúl taratty

ALMATY. QazAqparat - Almaty Naýryz merekesin toılaýdy bastap ketti. Búgin kóshede qydyryp júrgen halyqqa qyzǵaldaq pen baýyrsaq taratyldy, dep habarlaıdy QazAqparat tilshisi.

Almaty ákimdigi men «Nur Otan» partııasy «Jas Otan» jastar qanatynyń «Qyzǵaldaq syıla!» respýblıkalyq chellendjin qabyl alyp, odan ári jalǵastyrdy.

Aktsııa nátıjesinde Naýryzdy toılaýǵa jınalǵan qaýymǵa táttiden shashý shashylyp, bir tal jaýqazynnan taratyldy.

«Biz osy aktsııa arqyly turǵyndardyń kóńil kúıin kótermek boldyq. Naýryz tek qazaqtyń ǵana meıramy emes, búkil túrki dúnıesiniń meıramy. Bereke men molshylyqtyń sımvoly ispettes, shashý shashyldy. Bul qazaqtyń ejelden kele jatqan dástúri. Shashýdan aýyz tıgen adamnyń úıinde toı bolady degen senim bolǵan. Qazaqtyń ár shańyraǵynda qandaı azdaǵan qýanysh bolsyn, shashý shashylatyn bolǵan. Sonymen qatar, almatylyqtarǵa baýyrsaq taratyldy», - dedi qalalyq Mádenıet basqarmasy basshysynyń orynbasary Danııar Alıev.

Aıta ketý kerek, keshe astanalyqtar «Qyzǵaldaq syıla!» chellendjin bastaǵan edi. Sondaı-aq, búgin tańerteń Almatyda Ulystyń uly kúni kelgeniniń belgisi retinde saltanatty sherý boldy. Almaty kóshelerimen qazaq epostarynyń batyrlary, ertegi keıipkerleri júrip ótti.