Almatylyqtar koronavırýsty kóbine saýda úıi men qoǵamdyq kólikte juqtyrady – epıdemıolog

ALMATY. QazAqparat- Almatyda bir aptada 187 adamnan koronavırýs ınfektsııasy anyqtaldy. Bul týraly Óńirlik kommýnıkatsııalar qyzmetiniń alańynda qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova aıtty, dep habarlaıdy QazAqparat tilshisi.

Spıkerdiń sózinshe, qalada koronavırýs juqtyrǵandar sany artýyna qaramastan, megapolıstegi jaǵdaı turaqty, «jasyl» aımaqta ornalasqan.

«Sońǵy aptada KVI juqtyrý 1,2%-ǵa óskeni baıqalady. Osylaısha, ótken 7 kúnde 155 juqtyrý jaǵdaıy anyqtalsa, osy joly 187 jaǵdaı tirkeldi. Kovıd naýqastaryna arnalǵan tósek-oryndarynyń 100 000 adamǵa shaqqandaǵy toltyrylý deńgeıi 9,2 (27 adam) nemese bólingen 450 tósek-orynnyń 6%-yn quraıdy»,- dedi ol.

Ásel Qalyqovanyń aıtýynsha, naýqastardyń basym bóligi vırýsty – saýda obektilerinde 33,3% , qoǵamdyq kólikte – 41,6%, bazarlarda – 5,4% juqtyrǵan, basqa óńirde 6,5 %.

«Sondaı-aq otbasynda naýqas adammen baılanys– 7,1%, týystary men kórshilerine barý kezinde – 3,0%, jumys ornynda – 3,0% juqtyrý jaǵdaılary anyqtalǵan. Aýrý juqtyrǵandardyń kópshiligi 20-39 jas aralyǵyndaǵy jastar – 46,5% jaǵdaı. Odan keıingi orynda 40-59 jas aralyǵyndaǵy azamattar – 22%, sondaı-aq 60 jáne odan joǵary jastaǵylar – 16%»,- dedi ol.

Aıtýynsha, balalar men jasóspirimder arasynda vırýsty juqtyrý deńgeıi áldeqaıda tómen: 1 jasqa deıingi balalar – 6,4%, 14 jasqa deıingiler – 4,3%, 15-19 jas aralyǵyndaǵy jasóspirimder men jastar – 6,9%.

Brıfıng sońynda Ásel Qalyqova 6 aı saıyn belsendi túrde vaktsına alý kerektigin, adam kóp jınalatyn jerlerden aýlaq bolýdy, al kelýshiler kóp jınalatyn qoǵamdyq oryndarda bolý qajet bolǵan jaǵdaıda medıtsınalyq betperde kııýdi, áleýmettik qashyqtyqty jáne jeke bas gıgıenasyn saqtaýǵa keńes berdi.