Almatylyqtar koronavırýstan qalaı emdelip jatyr- saýalnama
Bul saýalnamany Taýarlar men qyzmetterdiń sapasy men qaýipsizdigin baqylaý departamenti Asfendııarov atyndaǵy Medıtsınalyq ýnıversıtetiniń qoldaýymen júrgizdi.
Saýalnama nátıjesi suralǵan almatylyqtardyń shamamen 24%-ynyń ózin-ózi emdeıtinin kórsetti.
Ýnıversıtet stýdentteri Nazarbaev dańǵyly, 91/97 mekenjaıynda ornalasqan №2 dárihanaǵa; Áýezov kóshesi, 175; Pýshkın kóshesi, 13; Panfılov kóshesi, 20 mekenjaılarda ornalasqan qaladaǵy iri dárihanalarǵa kelýshiler arasynda saýalnama júrgizdi.
Saýalnamaǵa qatysqandardyń jastary 20-55 jáne 56-dan joǵary. Olardyń 81 paıyzy - qala turǵyny, 19 paıyzy - syrttan kelgender.
Zertteý tobynyń basshysy, Asfendııarov atyndaǵy Medıtsına ýnıversıtettiń Farmatsııa mektebiniń dekany Zýrııad Sakıpovanyń aıtýynsha, saýalnamany júrgizgen stýdent-volonterler jurtshylyqpen jumys isteý barysynda sanıtarlyq qaýipsizdik normalaryn saqtaý boıynsha arnaıy daıyndyqtan ótken.
«Dárini sizge kim taǵaıyndady?» degen saýalǵa 66 adam «dáriger» dep jaýap bergen, bular saýalnamaǵa qatysqandardyń 54 paıyzy. Al 29 adam nemese olardyń 24 paıyzy ózin-ózi emdeıtinin aıtqan. Taǵy 10 paıyzy, ıaǵnı 12 adam ınternetke júginedi eken, qalǵan 15 adam nemese 12 paıyzy jaýap berýge qınalǵan nemese túrli syltaýlar aıtqan. Mańyzdy saýaldyń biri – dárini retsept arqyly alý. Respondentterdiń 45 paıyzy (55 adam) retseptteri bar ekenin rastady, 55 paıyzy nemese 67 adam dárini retseptsiz alǵan. Dárilerdiń emi jóninde túrli pikirler aıtyldy. JRVI- ǵa qatysty dárilerdi saýalnamaǵa qatysqandardyń 33 paıyzy nemese 40 adam, ókpeniń qabynýyn (pnevmonııany) emdeıtin dárilerdi 23 paıyzy (28 adam), COVID-19-dan emdelý úshin 12 paıyzy (15 adam), basqa aýrýdan emdelý úshin 32 paıyzy nemese 39 adam alǵan.
Dárihanalar klıentteriniń 54,1 paıyzy nemese 66 adam dári-dármekterdi ózderi úshin alǵanyn, al 38,5 paıyzy nemese 47 adam ózgeler úshin alǵandaryn aıtty. Bir adam «dáriniń qoryn» jasaý úshin alatynyn jasyrmady.
Almaty qalasynyń Taýarlar men qyzmetterdiń sapasy men qaýipsizdigin baqylaý departamenti tek dárigerdiń nusqaýlaryn oryndaýdy, ózin-ózi emdeýmen aınalyspaýdy, Internettegi jáne resmı emes derek kózderindegi keńesterge júginbeýdi eske salady.
«Antıbıotıkter men vırýsqa qarsy preparattardy bakterıaldyq nemese vırýstyq ınfektsııa boıynsha tek klınıkalyq jáne laboratorııalyq málimetter negizinde dáriger ǵana berýi tıis», - dedi departamentten.