Almatylyqtar qala ákiminen Rysqulov dańǵylyn uzartý jobasyn qaıta qaraýdy surady
Terekti yqshamaýdanynyń turǵyny dańǵyldyń boıynda 200-den astam úıde 1,5 myń adam turyp jatqanyn aıtty.
«Men Terekti shaǵynaýdanynda turamyn. Rysqulov dańǵyly Ońǵarsynova kóshesinen qala shekarasyna deıin uzartylady. Osyǵan baılanysty baspanamyzdy buzý máselesi týyndap otyr. Osy jobany qaıta qaraýyńyzdy suraımyz, óıtkeni bul memleket úshin de, turǵyndar úshin de ekonomıkalyq jaǵynan tıimsiz. Bul úılerde kópbalaly otbasylar turady, múgedek analar bar. Kezinde bul jer telimderin satyp alǵanbyz, munyń bári zańdastyrylǵan. Endi memleket bizge naryqtyq quny boıynsha ótemaqy tóleıdi, biraq bul aqshanyń qashan bolatyny da belgisiz. Osy jobany qarap shyǵýyńyzdy suraımyz, memleketke de, bizge de tıimdi bolatyn nusqalar kóp. Onda 200-den astam úı men 1,5 myń adam bar. Úı turǵyzý úshin qyrýar qarjy saldyq, barlyǵynda nesıe bar», - dedi aýdan turǵyny.
Qalalyq mobıldilik basqarmasynyń basshysy Saǵyndyk Telibaev atalǵan jobanyń jobalyq-smetalyq qujattary daıyn jáne memlekettik saraptamadan ótkenin aıtty.
«Dańǵyl qurylysyn bastaýǵa jergilikti bıýdjetten aqsha bólindi. Alty jolaqty jol bolady. Jerdi satyp almaı, bul joldy salmaımyz», – dedi ol.
Almaty ákimi Erbolat Dosaev qalaǵa Terekti shaǵynaýdany qosylǵanyn atap ótti. Ol kezinde qala halqynyń sany 1,2 mln bolsa, qazir 2,2 mln jetti.
«Qala, ókinishke oraı, óz zańdarymen ómir súredi. Biz jobany qaıta qarap, úılerdi aınalyp óte almaımyz. Bul múmkin emes. Biz buǵan deıin uzartylǵan kóshe boıyndaǵy úılerdiń turǵyndaryna ótemaqyny keshiktirmeı ótedik. Oǵan ýaıymdaýdyń qajeti joq, biz sizge naryqtyq quny boıynsha ótemaqy tóleımiz. Bul jobany múmkindiginshe taǵy da qaıta qaraımyz, biraq aıta keteıin, jobalyq-smetalyq qujattary bekitilgen, bıýdjetten aqsha bólingen, Rysqulov dańǵylyn Úlken Almaty aınalma avtomobıl jolyna deıin uzartamyz. Biz bul jobany baıaǵyda aıaqtaýymyz kerek edi, biraq pandemııaǵa baılanysty keshiktirildi. 2025 jylǵa deıin uzartý jumystaryn aıaqtaýymyz kerek. Úlken Almaty aınalma joly jazda ashylady», - dedi ákim.