Almatylyqtar Birlik kúnin toılap jatyr

ALMATY. QazAqparat – Ońtústik astanalyqtar Qazaqstan halqynyń birligi kúnin toılap jatyr. Respýblıka saraıynyń aldynda kórme uıymdastyrylyp, onda kóptegen ulttardyń salt-dástúrine saı qolóner týyndylary men ulttyq taǵamy, kıimderi qoıyldy, dep habarlaıdy QazAqparat tilshisi.

Abaı alańyna halyq kóp jınaldy. Kóńilderi kóterińki, bir-birin quttyqtap jatyr. Árbir ult óziniń mádenıetinen syr shertetin kórme usyndy.

Merekelik kontsert «JasStars» toby men QR Memlekettik eńbek sińirgen «Saltanat» bı ansambli oryndaǵan «Qazaqstan - dostyq besigi» vokaldyq-bı kompozıtsııasymen ashyldy, kórermender úshin qazaqstandyq jáne sheteldik ártister óner kórsetti.

Óz kompozıtsııalaryn halyqaralyq baıqaýlardyń laýreattary Zarına Hasanshına, Ózbekstan, Qaraqalpaqstan, Bashqurtstan halyq ártisi Jeńisbek Pııazov jáne Belarýs Respýblıkasynyń eńbek sińirgen ártisi Janet Býterýs oryndady.

Sonymen qatar, shara barysynda Qazaqstan halyqtarynyń taǵam festıvali uıymdastyryldy, oǵan 15 meıramhana qatysty. Qazaq, káris, grýzın, orys, uıǵyr jáne taǵy basqa ulttyń taǵamdary usynyldy.

Saltanatty is-sharaǵa Almaty qalasynyń ákimi Erbolat Dosaev qatysty.

Birlik kúni qalanyń Jibek Joly, Panfılov kósheleri men Ǵylym Akademııasy ǵımaratynyń aldyndaǵy Sh.Ýálıhanov atyndaǵy skverde de joǵary dárejede atalyp ótýde. Kórermender «Almaty Áýenderi», «Alataý» dástúrli óner teatry ártisteri men Qazaqstan halqy Assambleıasynyń, mýzykalyq ansambli usynǵan merekelik baǵdarlamany tamashalady.

Merkelik baǵdarlama Abaı alańynda saǵat 18:00-de «Dostyq áni» kontsertimen jalǵasady. Sahnada Aıqyn Tólepbergen, Qanay, Áıgerim Qalaýbaeva, Artýr Davletıarov, Ayree jáne KeshYou toby óner kórsetedi.

Aıta keteıik, Qazaqstan halqynyń birligi kúninine arnalǵan is-sharalar qalanyń barlyq aýdanynda toılanyp jatyr.