Almatylyqtar Áz Naýryz merekesin toılaýdy bastady
Almatyda Naýryz merekesin toılaý 20 naýryzdan bastaldy. Kóktemniń shýaqty kúninde almatylyqtar kıiz úı tigip, ulttyq kıimmen kóshege qydyrýǵa shyǵa bastady. Kóshelerde qurylǵan sahnalarda án shyrqalyp, qonaqtar ulttyq dastarhannan dám tata bastady.
Qazaqstan halqy Assambleıasy da merekeni búginnen bastady. Áıgili «Dostyq úıi» ǵımaraty aldynda ulttyq etno-mádenı birlestikterdiń ókilderi jınalyp, ortaq meıram áz-Naýryzǵa degen qurmetterin tanytty. Atap aıtqanda, Almatydaǵy koreılerdiń ulttyq ortalyǵy, Almaty nemisteriniń ulttyq ortalyǵy, Daǵystan, uıǵyr, ózbek, ázerbaıjan ortalyqtarynyń ókilderi án salyp, bı bıledi.
N.Tilendıev atyndaǵy «Otyrar sazy» orkestri men Almaty ákiminiń kontsert orkestri qazaq mýzykasynyń eń úzdik sazdaryn oryndasa, Internet jelisine tanylǵan Andreı Fendrıkov dombyranyń qońyr únin kúmbirletti.
QR Eńbegi sińgen qaıratker Alma Amanjolova án shyrqap, kelýshilerdiń kóńilinen shyqty.
Sonymen qatar, Dostyq úıinde Naýryz taqyrybyna arnalǵan kórme-jármeńke ashyldy.
Al, Almatynyń kásipkerler palatasy mekeme aldyndaǵy alańqaıǵa altybaqan ornatyp, kıiz úı tigip, qyz-bozbalanyń kóńil kóterýine jaǵdaı jasady. Sondaı-aq, naýryz kóje men tegin baýyrsaq taratty.
Aıta keteıik, megapolıste negizgi merekelik sharalar 21-23 naýryz kúnderi ótedi. Qazirgi ýaqytta Astana alańyn merekege ázirleýge baılanysty Tóle bı kóshesiniń Abylaı han dańǵylynan bastap, Nazarbaev dańǵylyna deıingi bóliginde jol qozǵalysy shekteldi. «Almaty Arena» jáne «Halyq Arena» sport keshenderinde de naýryz merekesine arnalǵan keshter ótedi.