Almatylyqtar aýany lastaǵan tıpografııany jabýdy ótindi

ALMATY. QazAqparat – Almatyda Medeý aýdanynyń turǵyndary aýany lastaǵan tıpografııany jabýdy surady, dep habarlaıdy QazAqparat tilshisi.

Turǵyndar tıpografııa bóletin hımııalyq zattar aǵzaǵa zııan keltiretindigin aıtýda. Olar kásiporyndy jabý úshin sotqa aryzdanǵan.

Búgin daýly máseleni sheshý úshin «Nur Otan» partııasy, prokýratýra jáne polıtsııa ókilderi tıpografııaǵa tekserispen keldi.

«Turǵyndardyń shaǵymyn teksere kele myna nárseni anyqtadyq. Polıgrafııalyq kásiporyn aýǵa azııandy zattardy kóp bólgen. Saraptama qorytyndysy sony aıǵaqtady. Qazir sanıtarlyq-epıdemıologııalyq baqylaý departamenti bul materıaldardy sotqa jiberdi», - dedi «Nur Otan» partııasy Almaty qalalyq bólimshesi tóraǵasynyń orynbasary Stanıslav Kankýrov.

Bul máseleni partııa óz baqylaýyna aldy.

Tabıǵatty qorǵaý prokýratýrasy halyq aryzyn negizge ala otyryp, tekserý júrgizgen. Nátıjesinde qorshaǵan ortaǵa bólinetin zattar zııandy ekeni anyqtaldy.

«Materıaldar sotqa berildi. Kásiporyn basshylyǵyna ekologııalyq saraptamanyń qorytyndysyna saı qujattardy retke keltirý tapsyryldy. Іs materıaldary qazir sotqa berildi. Sot kásiporynnyń jumysyn toqtatý nemese jabý máselesin qarastyryp jatyr», - dedi mamandandyrylǵan prokýror Talǵat Ýrajanov.

QR Taýarlar men kórsetiletin qyzmetterdiń sapasy men qaýipsizdigin baqylaý komıteti Almaty qalalyq departamentiniń basshysy Aızat Moldaqasymovanyń aıtýynsha, tutynýshylar mamyr aıynan bastap shaǵymdana bastaǵan.

«Biz birneshe ret tekserýge oqtaldyq. Kásiporyn ókilderi jaýaptan qashyp júrdi. Prokýratýra men Memlekettik kirister departamentiniń kómegimen maǵlumat aldyq. Tekserý bastalǵaly beri kásiporyn jumys istep turǵan joq. Kásiporyn bizdiń ruqsat qujatymyzsyz 5 kún, 4 tún jumys jasaǵan», - dedi Aızat Moldaqasymova.

Mundaı óndiris oryndary turǵyndardan 100 metr qashyqta ornalasýy tıis.

«Bul mekemeniń qyzmeti ákimshilik sotta qaralǵan bolatyn. Sot sheshimimen jarty mıllıon aıyppul salyndy. Qazir kásiporyndy jabý boıynsha ekinshi is tergeý sotynda qaralyp jatyr. Polıgrafııalyq bıznestiń barlyǵynda memlekettik organdardyń ruqsaty bolýy tıis», - dedi Aızat Moldaqasymova.

JShS ókilderi memlekettik organnyń sheshimimen kelispeıtinin, qarsy aryz beretinin aıtty.