Almatylyqtar Abaı jaıly fılmderdi kólikterinen shyqpaı kóre alady

ALMATY. QazAqparat – Búgin Almatyda Abaıdyń mereıtoıyn atap ótý aıasynda uly aqynnyń ómiri jaıly fılmder ashyq aspan astyndaǵy kınoteatrda kórsetiledi, dep habarlaıdy QazAqparat tilshisi.

«Ulttyq kınony qoldaý memlekettik ortalyǵy» kommertsııalyq emes aktsıonerlik qoǵamynyń málimentinshe, bul oı karantındik sharalar jaǵdaıynda keń aýdıtorııaǵa kınofılmderdi kórsetýdiń múmkin bolǵan jalǵyz qaýipsiz túri – avtomobıldik kınoteatrdyń ashylýynyń arqasynda júzege asyrylyp otyr.

QR Mádenıet jáne sport mınıstrligi, Ulttyq kınony qoldaý memlekettik ortalyǵy jáne Sháken Aımanov atyndaǵy «Qazaqfılm» kınostýdııasynyń qoldaýymen Abaı Qunanbaevtyń qurmetine ártúrli jyldary túsirilgen eki ómirbaıandyq kınokartınanyń ashyq kórsetilimi ótedi:

- «Abaı óleńderi» («Pesnı Abaıa») - Muhtar Áýezovtiń «Abaı joly» shyǵarmasy boıynsha 1945 jyly túsirilgen. Kartına rejısserleri - Grıgorıı Roshal men Efım Aron.

- «Abaı» - rejısseri Ardaq Ámirqulov. Kıno uly aqynnyń 150 jyldyǵyna oraı 1995 jyly túsirilgen.

«Kınoteatrdyń jańa, al anyǵyn aıtqanda kópten umyt bolǵan ashyq aspan astyndaǵy eski pishimi óz jumysyn «Atakent» kórme ortalyǵynyń aýmaǵynda bastady. Ol 200 avtokólikke eseptelgen. Oıdy júzege asyrýshylar is júzinde baılanyssyz qatysýdy qamtamasyz etti: bıletti tek saıtta ǵana satyp alýǵa bolady, búkil kınoseans kezinde kórermender bir-birinen edáýir qashyqtyqta turaqtaǵan avtokólikterdiń ishinde otyrady»,– dep habarlady «Ulttyq kınony qoldaý memlekettik ortalyǵy» KEAQ-nyń baspasóz qyzmetinen.

Fılmderdiń kórsetilimi 20:30-da jáne 23:00-de ótedi.